Закон за игри на среќа: GPS на апаратите, крај на лиценцната шпекулација и стандарди против перење пари

Покрај познатата мерка за оддалеченост од 500 метри, усвоениот Закон за игри на среќа носи и неколку технички но суштински важни новини кои директно удираат во начинот на кој индустријата функционирала со децении.

Секој апарат за игри на среќа отсега мора да има вграден GPS систем поврзан со Управата за јавни приходи. Во пракса тоа значи дека УЈП во секој момент знае каде физички се наоѓа секој апарат во државата. Досега операторите можеле слободно да преместуваат апарати, да сокриваат реален промет или да работат надвор од регистрираните локации. Со GPS, секое поместување е видливо во реално време, а секое несовпаѓање помеѓу пријавената и реалната локација станува основа за санкција.

Уште поважна е промената во системот на лиценцирање. Досега компанија добивала една лиценца и врз основа на неа отварала неограничен број објекти низ целата земја, со еден административен чекор и едно плаќање. Со новите измени, секој објект мора да поседува своја посебна лиценца, а се воведуваат и нови финансиски давачки за отворање на секое уплатно-исплатно место. Отворањето нов објект повеќе нема да биде евтино и едноставно.

- Advertisement -

Третата мерка е поврзана со меѓународните стандарди. MONEYVAL, телото на Советот на Европа кое ги оценува државите според стандардите за спречување перење пари и финансирање тероризам, со години укажуваше дека казино секторот во Македонија е класично ризичен, со голем готовински промет, слабо следливи трансакции и честа неверификација на идентитетот на играчите. Законот сега ги вградува препораките на MONEYVAL директно во регулативата, вклучувајќи и зголемени банкарски гаранции кои операторите мора да ги положат пред да добијат лиценца.

Гледано заедно, трите мерки формираат еден систем, GPS го следи физичкото движење на опремата, забраната за мултиплицирање го ограничува ширењето, а MONEYVAL стандардите го чистат секторот од сомнителен капитал. Не се работи само за заштита на младите, туку и за сериозна финансиска регулација на индустрија која со години работела практично без надзор.