Изгоре луксузен хотел на познато летувалиште

Една жена го загуби животот, а речиси 1.700 туристи во паника се евакуирани поради огромен пожар што избувна вчера во познатото летувалиште Бајахибе во Доминиканската Република.

Одморалиштето „Вива Доминикус Бич бај Виндам“ се наоѓа во Бајахибе, популарна дестинација за американски и меѓународни туристи на југоисточниот брег на Доминиканската Република. Властите објавија дека околу 1.690 туристи морале да бидат евакуирани од одморалиштето во други хотели и блиски станбени објекти поради огромниот пожар.

Жртвата е идентификувана како Франческа Валентино, 46-годишна државјанка на Италија. Според итните служби, три лица се итно пренесени во болница, додека на уште шестмина им е укажана помош на самото место на несреќата, вклучувајќи гости, посетители и членови на спасувачките тимови.

- Advertisement -

Снимките објавени на локалните медиуми и социјалните мрежи прикажуваат густи облаци од црн чад како се издигнуваат над карипскиот брег, додека огнените јазици целосно го голтаат покривот на одморалиштето.

„Првичните согледувања укажуваат дека пожарот се проширил со огромна брзина поради лесно запаливата природа на покривните конструкции направени од палмини листови, но и поради силниот ветер“, соопштија од Центарот за итни операции (COE).

Пожарот по тешка борба е ставен под контрола, но причините за неговото избувнување сè уште се истражуваат.

Другиот близок хотел на „Вива Виндам“, „Доминикус Палас“, не бил оштетен од пожарот и работел нормално, соопшти центарот.

Доминиканската Република, позната по своите кристално чисти води и бели песочни плажи, е водечка туристичка дестинација на Карибите. Само во првите пет месеци од годинава, земјата ја посетиле рекордни 5,6 милиони туристи.