Русија му вели на американскиот претседател Доналд Трамп да ги „тргне рацете“ од ретките минерали во Украина, пишува бриселски Политико, цитирајќи го портпаролот на Кремљ Дмитриј Песков. Портпаролот ја коментираше изјавата на Трамп дека ќе ја услови поддршката за Киев со пристап до рудните богатства на земјата.
– Ако ги нарекуваме работите како што се, ова е предлог да се купи помош, со други зборови, (помошта) да не се дава безусловно, или од некои други причини, туку конкретно да се обезбеди на комерцијална основа – изјави Песков за новинарите.
Тој рече и дека „би било подобро, се разбира, помошта воопшто да не биде обезбедена, бидејќи тоа ќе придонесе за крај на овој конфликт“.
Во меѓувреме, „Њујорк Тајмс“ напиша дека за Украина е добредојден предлогот на Трамп.
Трамп во понеделникот објави дека „се обидува да направи договор со Украина“ во кој САД ќе обезбедат воена помош за војната против рускиот претседател Владимир Путин во замена за „ретките земји“ на Украина.
– Инвестираме стотици милијарди долари. Тие имаат големи ретки земјини и јас сакам сигурност од ретките земји – рече тој во Вашингтон, додавајќи дека Украина е „подготвена да го направи тоа“.Тој рече и дека „во моментов работиме на некои договори, имаме одредени гаранции и некои други работи за да продолжиме со целата ситуација“.
Некои од критичните минерали се во областите кои во моментов се под окупација од Русија.
Украина сè уште не го коментираше предлогот на Трамп, но споделувањето ресурси со сојузниците е дел од „победничкиот план“ на претседателот Володимир Зеленски за војната против Русија. Германскиот канцелар Олаф Шолц го критикуваше предлогот на Трамп, нарекувајќи го „многу егоистичен, многу егоцентричен“ иждодавајќи дека на Украина ќе ѝ требаат нејзините природни ресурси за финансирање на повоената обнова.
Според извештајот на Светскиот економски форум, Украина располага со пет отсто од светските резерви на минерални суровини. Земјата има стратешки резерви на титаниум, литиум, графит и ураниум, што е од клучно значење за нејзината идна економска стабилност.
