АКТИВНИ ПОЖАРИ ВО МАКЕДОНСКИ БРОД И ВО СТРУМИЧКО

Вкупно 18 пожари на отворен простор се регистрирани во државата до 18 часот, од кои два сè уште се активни, четири се ставени под контрола, а 12 се целосно изгаснати, информира Центарот за управување со кризи (ЦУК).

Најсериозна останува состојбата во општина Македонски Брод, каде што пожарот кај селото Грешница, во месноста Стојанова Населба, и натаму гори и зафаќа ниска вегетација, деградирана шума и грмушки.

Активен е и пожарот во струмичко, меѓу селата Ново и Старо Коњарево, каде што огнот зафатил стрниште.

- Advertisement -

Под контрола, според ЦУК, се четири пожари. Екипите сè уште интервенираат на депонијата во Делчево, кај селото Падалишта во гостиварско, каде што гори ниска вегетација и нискостеблеста шума, на дивата депонија кај селото Долна Белица во струшко, како и кај селото Блато, во атарот на Врбјани во општина Кривогаштани, каде што огнот зафатил ниска вегетација и стрниште.

Во меѓувреме, пожарникарите успеале да изгаснат 12 пожари што избувнале во текот на денот. Интервенции имало кај Моноспитово во Босилово, Севендели во Валандово, меѓу Селемли и Стојаково во гевгелиско, на автопатот Гостивар – Тетово, кај Фалиште во Желино, Теново во Брвеница, покрај железничката пруга во Маџари, во населбата Гоце Делчев во Скопје, кај Дуброво во Неготино, Кондово во Сарај, Крупиште во Штип и Уларци во Чешиново-Облешево.

Од Центарот за управување со кризи апелираат граѓаните да бидат внимателни при движење и престој на отворено, бидејќи високите температури и сувата вегетација значително го зголемуваат ризикот од појава и брзо ширење на пожари.