За само шест часа санкционирани 222 мотоциклисти, 14 приведени

Полицијата санкционирала 222 возачи на мотоцикли во засилена акциска контрола што вчера попладне и вечерта беше спроведена низ целата држава. Најголем дел од прекршителите биле затекнати без заштитна кацига, а 14 лица завршиле во полициска станица поради безобѕирно управување со моторно возило.

Како што соопшти Министерството за внатрешни работи, контролата се спроведувала од 17 до 23 часот, а од вкупно 222 санкционирани мотоциклисти, дури 186 не користеле заштитна кацига за време на возењето.

Во акцијата биле лишени од слобода и 14 возачи, кои ќе одговараат за кривичното дело „безобѕирно управување со моторно возило“ според член 297-а од Кривичниот законик. Според МВР, сите тие управувале мотоцикл без возачка дозвола.

- Advertisement -

За време на контролата биле одземени и 14 мотоцикли.

Освен прекршоците кај мотоциклистите, полицијата евидентирала и санкционирала уште 197 други сообраќајни прекршоци.

Од Министерството за внатрешни работи најавуваат дека засилените сообраќајни контроли ќе продолжат и во наредниот период, а до сите учесници во сообраќајот упатија апел доследно да ги почитуваат сообраќајните правила и прописи за поголема безбедност на патиштата.