Селин Дион продолжува со големото враќање на музичката сцена, а од концертите во Париз, се појави и во специјална изведба во чест на легендарниот австралиски пејач Џон Фарнам

Селин Дион продолжува со големото враќање на музичката сцена, а од концертите во Париз, се појави и во специјална изведба во чест на легендарниот австралиски пејач Џон Фарнам.

Дион се вклучи од Париз во големиот концерт „The Songs of John Farnham“, кој во неделата (20.09) се одржа во „Род Лејвер арена“ во Мелбурн. Таа ја изведе „You’re the Voice“, една од најпознатите песни на Фарнам, во снимена изведба емитувана пред публиката во Австралија. На концертот настапија повеќе од 120 музичари и изведувачи, а меѓу гостите преку видео беа и Крис Мартин и Хју Џекмен.

- Advertisement -

Фарнам, кој по операциите поради рак на усната шуплина повеќе не може да настапува, не присуствуваше на концертот. Неговото семејство во пресрет на настанот соопшти дека во последните месеци неговото здравје се влошило и дека му е потребна 24-часовна нега, како и постојана поддршка со кислород. Концертот беше организиран и како хуманитарен настан за „Head and Neck Cancer Australia“, организацијата која му помогна на Фарнам за време на неговото лекување.

За Дион, пак, ова е уште еден значаен момент во периодот на нејзиното враќање на сцената. На 12 септември таа го одржа првиот целосен концерт по повеќе од шест години, со што започна серијата од 16 настапи во Париз оваа есен. Нејзиното враќање доаѓа по долгата пауза предизвикана од синдромот на вкочанета личност, ретко невролошко нарушување за кое пејачката јавно зборуваше во 2022 година.

А во петокот, по нејзиниот трет париски концерт, Дион им приреди уште еден неочекуван момент на обожавателите кои ја чекаа пред хотелот. Боса се качи на автомобил и застана на хаубата додека фановите ја пееја „Pour que tu m’aimes encore“. Без микрофон, таа им се придружи на пеењето и го насочуваше распеаниот собир пред хотелот. Снимките од сцената потоа се проширија на социјалните мрежи.

Интересот за нејзиното враќање очигледно не стивнува. По овогодишните настапи, Дион веќе има закажано уште десет концерти во Париз во мај 2027 година, од 8 до 29 мај.