Европските клубови би можеле да го бојкотираат Светстското клупско првенство

Односите меѓу Европската фудбалска унија (УЕФА) и Светската фудбалска федерација (ФИФА) повторно се во центарот на вниманието, откако британските медиуми објавија дека претседателот на УЕФА, Александер Чеферин, размислува за бојкот на Светското клупско првенство во 2029 година.

Според информациите, Чеферин планира да обезбеди поддршка од водечките европски клубови преку разговори со претседателот на Европската асоцијација на клубови (ECA) и прв човек на Пари Сен Жермен, Насер Ал-Келаифи. Целта е да се изврши притисок врз раководството на ФИФА поради незадоволството од организацијата на новото проширено Светско клупско првенство.

Како што наведуваат британските медиуми, дел од европските клубови имаат сериозни забелешки за натпреварувачкиот календар, финансиските услови и сè поголемиот број натпревари, кои дополнително го оптоваруваат распоредот на фудбалерите.

- Advertisement -

Во исто време, се тврди дека Чеферин нема намера да се кандидира за претседател на ФИФА, туку работи на формирање поширока коалиција што би застанала зад друг кандидат на следните претседателски избори. Засега не е познато кој би можел да ја добие поддршката од европските федерации, но, според извештаите, разговорите веќе се во тек.

Од друга страна, актуелниот претседател на ФИФА, Џани Инфантино, и натаму ужива силна поддршка од голем број национални федерации, особено од Азија, Африка и Јужна Америка, што би можело да биде пресудно во евентуалната изборна трка.

Доколку европските клубови навистина решат да го бојкотираат Светското клупско првенство, тоа би претставувало сериозен удар за натпреварувањето и дополнително би ги продлабочило тензиите меѓу двете најмоќни фудбалски организации.