Заврши првата рунда преговори во Швајцарија

Заврши првата рунда разговори меѓу Иран и САД во Швајцарија, изјави извор близок до преговарачкиот тим.

Иранската новинска агенција Тасним објави дека делегацијата на Иран одби заедничко фотографирање со американската делегација.

Американците и посредниците во разговорите, Пакистан и Катар, планирале да има ракување и заедничка церемонија на фотографирање, но Иранците одбиле.

- Advertisement -

Иранската делегација протестирала до американските претставници за заканите кон Иран што денеска ги упати претседателот Доналд Трамп.

Иранската државна телевизија објави дека на првата 80-минутна сесија од разговорите не се дискутирало за нуклеарната програма на Иран, туку за почитувањето на договорот меѓу САД и Иран и за ситуацијата во Либан.

Потпретседателот на САД, Џеј Ди Венс, кој ја преводи американската делегација, во која се и Стив Виткоф и Џаред Кушнер, денеска изјави дека разговорите во Швајцарија со иранската страна за поширок договор на Блискиот Исток, можат да бидат историски и да доведат до трансформација на регионот и до трајно подобрување на односите со Иран.

Американскиот претседател денеска прво му се закани на Иран дека ќе го „удри уште посилно“ ако не го запре својот сојузник во Либан – Хезболах, а потоа упати закани и до иранските преговарачи дека „нема да се вратат во својата земја“ ако Техеран повторно го блокира Ормускиот Теснец.

По ова Иранците одговорија дека се подготвени да одговорат на заканите, а потоа ги прекинаа разговорите во знак на протест.

– Не мислат ли дека ако нивните закани имаа некаков ефект, немаше да стигнат до очајот со кој се соочуваат денес? Воопшто не ги земаме предвид заканите на Американците – рече главниот преговарач на Иран, Мохамед Багер Галибаф.

Иран извести дека постигнале нацрт-договор за тоа дека САД ќе издадат одлука за укинување на санкциите за извоз на иранска нафта, што е еден од клучните предуслови пред Иран да почне разговори за неговото нуклеарно досие. Иранските официјални лица тврдат и дека е постигнат напредок во одмрзнувањето на иранските пари на банкарските сметки во странство.

Техеран соопшти и дека ја обновил блокадата во Ормускиот Теснец во знак на протест поради континуираните израелски напади во Либан, како и дека Трамп му дозволува на Израел да го прекрши меморандумот за разбирање потпишан од американскиот претседател Трамп и неговиот ирански колега, Масуд Пезешкијан, минатата недела. Меморандумот јасно повикува на прекин на огнот на сите фронтови, но Израел во саботата уби повеќе од 30 луѓе во нападите во централен и во јужен Либан.

На разговорите во Швајцарија, Венс го минимизираше влијанието на насилството во Либан, велејќи дека е постигнат напредок кон прекинување на непријателствата таму.

– Овие работи секогаш се малку хаотични – рече тој.

Со омекнувачки тон, за разлика од тонот на Трамп, Венс додаде:

– Она што претседателот нè замоли да го направиме е да свртиме нов лист, да го трансформираме нашиот однос со народот на Иран и да подадеме рака, што ќе им каже на народот на Иран дека ако раководството е подготвено да се откаже од тоа да биде двигател на регионалната нестабилност, ако е подготвено да се откаже од амбициите за нуклеарно оружје на долг рок, тогаш САД се подготвени фундаментално да го трансформираат нашиот однос со таа земја. Прашањето пред нас сега е колку повеќе можеме да постигнеме заедно? Можеме ли да свртиме нов лист?