Апелацискиот суд Скопје ја одби жалбата на Самостојниот синдикат на контролорите на летање (ССКЛ) и ја потврди одлуката со која се забранува најавениот штрајк за октомври 2025 година

Апелацискиот суд Скопје ја одби жалбата на Самостојниот синдикат на контролорите на летање (ССКЛ) и ја потврди одлуката со која се забранува најавениот штрајк за октомври 2025 година, соопшти денеска правниот застапник на М-НАВ, адвокатот Горан Николоски.

Според него, судот ги прифатил аргументите на М-НАВ дека штрајкот не бил поврзан со заштита на работнички права, дека не е спроведена задолжителната постапка за посредување и дека ССКЛ нема самостоен правен легитимитет за организирање штрајк.

– Со оваа одлука се потврдува дека најавениот штрајк не е во согласност со законските процедури – изјави Николоски.

- Advertisement -

Тој додава дека одлуката отвора прашања и за претходни активности на ССКЛ.

– Судот утврди дека и претходни постапки биле спроведени надвор од законските рамки – рече тој.

Според Николоски, синдикатот не може да настапува самостојно надвор од својот матичен правен субјект и неговите статутарни правила.

Од М-НАВ оценуваат дека секоја идна синдикална активност мора да биде спроведена во согласност со Законот за работните односи и пропишаната постапка за посредување.

Штрајкот, кој беше најавен за 20 октомври 2025 година, предвидувал ограничување на летови и можни нарушувања во воздушниот сообраќај, но беше забранет со привремена судска мерка уште во прв степен.

Апелацискиот суд сега ја потврди таа одлука како правосилна.