Николоски и автопатиштата: Три децении изговори, едно министерство и безброј ветувања кои чекаат асфалт

Вицепремиерот Александар Николоски повторно настапи со речник кој веќе го знаеме напамет, „работиме на многу фронтови”, „најдобри автопатишта во регионот”, „реалните активности започнаа со нас”. Звучи инспиративно. Проблемот е што истите реченици ги слушаме со секоја нова влада, со секој нов министер за транспорт, со секоја нова предизборна кампања.

Кој ги изгуби тие три децении?

Николоски со леснотија зборува за „изгубени 30 години” речиси во прво лице множина, „ние изгубивме”, но внимателно избегнува да именува кој точно ги изгубил. ВМРО-ДПМНЕ, чија е тој член и функционер, управуваше со земјата значителен дел од тие „изгубени” децении. Значи ли тоа дека и самата партија сноси одговорност за патната инфраструктура во која сега со гордост „работи на многу фронтови”?

- Advertisement -

Бројките кои недостасуваат

Изјавата дека Македонија ќе има „најдобри автопатишта во регионот” е класичен популистички исказ без покритие. Кога? За колку години? Со колку километри автопат на 1.000 жители ќе ги надминеме Словенија, Хрватска или Србија? Овие прашања не добиваат одговор, затоа што одговорите не се медиумски атрактивни.

„Реалните активности започнаа со нас”

Ова е веројатно најдрскиот дел од изјавата. Договорот за автопатот Тетово, Гостивар беше потпишан пред оваа влада, но Николоски наоѓа начин и тоа да го претвори во своја заслуга. Логиката е едноставна, ако проектот успее, заслугата е нивна, ако не успее, договорот го потпишала претходната влада.

37 километри за прослава?

Пуштањето на 37 километри од автопатот Кичево, Охрид се претставува речиси како национален триумф. За споредба, Србија во последните неколку години отвори стотици километри автопат. 37 километри не се достигнување, тоа е минимум на минимумот.

Граѓаните на Македонија не им треба нов подкаст со ветувања. Им требаат завршени патишта, на време, во рамки на буџетот и без скандали. Сè додека тоа не се случи, секоја изјава за „најдобри автопатишта во регионот” останува токму тоа, изјава.