За една година се раскинати 170 договори и ослободени 3.000 хектари обработлива земја

Јавните повици кои што ги распишуваме наменети се за помалите земјоделци кои што не можат да го достигнат прагот за ИПАРД средства. Како држава ги помагаме за да влезат во процесот, да застанат на свои нозе и да можат наредните години да бидат корисници на овие средства, изјави министерот за земјоделство, шумарство и водостопанство, Цветан Трипуновски.

– Ова е еден од начините како помагаме на помалите земјоделци. Не зборувам само од аспект на финансиски поддршка, туку и од аспект на распределба на земјоделското земјиште. Ако сакате некого да убедите да влезе во земјоделски процес потребно е да му дадете механизација, но и земјоделско земјиште – рече Трипуновски во емисијата „За или против” на Алфа телевизија.

Тој посочи дека во изминативе 12 месеци се реализираа два јавни повика за распределба на земјоделско земјиште при што беше опфатена целата територија на Македонија. Склучени се повеќе од 2.100 договори, а се распределени околу 6.000 хектари.

- Advertisement -

-Морам да потенцирам дека не течеше само процесот на распределба на земјоделско земјиште, туку течеше и процесот на контрола на евентуални злоупотреби при што над 170 договори се раскинаа во изминатава година дена, повеќе од 2.500 до 3.000 хектари се ослободени – рече Трипуновски.

Тој посочи дека контролата ќе продолжи за да се спречат злоупотребите на земјоделско земјиште. И одземеното земјиште ќе биде распределено кај земјоделците кои што сакаат да работат.