Змијарник и дива депонија наместо базен: Десет години бетон, милиони евра и ниту еден пливач

На 12 ноември 2015 година, со голема церемонија, во присуство на тогашниот премиер Никола Груевски , официјално започна изградбата на затворениот пливачки базен во Охрид, во спортскиот комплекс „Билјанини Извори”. Роковите биле јасни, базенот требало да биде готов до април 2018 година. Минаа 2018, 2020, 2021, 2023, 2024 година. Базенот сè уште не е готов.

Парите потрошени, базенот незавршен

Вредноста на инвестицијата изнесува околу пет милиони евра народни пари. За тие пари, охриѓани добија армиранобетонски скелет кој со секоја измината зима сè повеќе личи на споменик на институционалната неодговорност. Според последните проценки, завршени се некаде помеѓу 20 и 60 отсто од градежните работи, во зависност од тоа кој функционер зборува и во кој период.

- Advertisement -

Смена на смена, ветување на ветување

Изведувачот „Бауер БГ” од Скопје доби договорот уште во 2015 година. Потоа следеа проблеми, замрзнати сметки, притвор за сопственикот на фирмата, застој во градбата. Се менуваа подизведувачи, се менуваа влади, се менуваа министри за спорт. Нималку не се менуваше состојбата на терен.

Во јули 2024 година, министерот за спорт Борко Ристовски лично дојде во Охрид, најави раскинување на договорот со изведувачот, ревизија на целиот проект и можна кривична пријава. Во ноември 2024 година потврди дека ревизијата е во тек. Во февруари 2025 година, фотографиите од терен покажуваат речиси иста слика, незавршен објект, отворена конструкција, ниту еден работник.

Струга може, Охрид не може

Додека Охрид чека, соседна Струга го реконструираше својот затворен базен и го отвори во 2023 година. Тетово доби нов базен. Други општини низ Македонија добија спортски објекти. Охрид, град под заштита на УНЕСКО, туристичка престолнина на земјата, влегува во десетта година на изградба на базен чија вредност е неколку милиони евра.

Кој одговара?

Прашањето кое никој гласно не го поставува е едноставно, кој одговара за десет изгубени години, за милиони потрошени пари и за базен кој сè уште нема крај над себе? Секоја нова влада ја наследува истата градба и истиот изговор, „проблемот е наследен”. А охриѓаните продолжуваат да пливаат само лете, во езерото, точно исто како пред десет години.

С.Денесовски