Украинскиот претседател Володимир Зеленски ужива поддршка од 57 отсто од граѓаните, покажа денеска објавена анкета, неколку часа откако американскиот претседател Доналд Трамп изјави дека рејтингот на Зеленски е само 4 проценти.
Телефонската анкета на Киевскиот меѓународен институт за социологија, спроведена врз 1.000 испитаници, покажа дека 57 отсто од нив му веруваат на Зеленски, додека 37 отсто изјавиле дека немаат доверба во него. Останатите биле неодлучни.
Анкетата, исто така, покажа дека довербата во Зеленски е зголемена за 5 отсто во однос на истражувањето од декември и покрај воените неуспеси на Украина.
По руската инвазија во март 2022 година, рејтингот на украинскиот претседател се искачи на 90 проценти, наведуваат од институтот. Според авторите на истражувањето, Зеленски успеал да „задржи релативно високо ниво на доверба“ меѓу граѓаните.
Поддршката за Зеленски е нешто пониска во јужните иво источните региони на Украина, каде што 55 отсто од испитаниците изјавиле дека имаат доверба во него.
Според украинскиот закон, претседателски избори не можат да се одржат за време на воена состојба, која е во сила од 24 февруари 2022 година.
Во нормални околности, мандатот на Зеленски требаше да заврши во мај минатата година.
Според авторите на анкетата, „поголемиот дел од украинското население и натаму смета дека изборите треба да се одржат по завршувањето на војната“.
