УЈП започна контрола на здружението „Охрид Трчат” по допрен глас на Охридскај

Според сознанијата до кои дојдовме, синоќа Управата за јавни приходи (УЈП) влегла со контрола во невладината организација „Охрид Трчат” во Охрид. Контролата е иницирана по допрен глас за кој порталот Охридскај претходно побара да реагираат УЈП и Финансиската полиција.
Од други извори дознаваме дека наскоро се очекува и контрола од страна на МВР на РСМ, поточно од одделот за економски криминал. Надлежните органи треба да утврдат каде завршиле милионските донации кои ги прибрала невладината организација „Охрид Трчат”.
Клучни прашања на кои се очекува да одговорат институциите:

Каде и како се потрошени значителните парични средства од наплатата на котизација на учесниците
Дали е воден благајнички извештај
Дали при наплатата на котизација во готово на учесниците им биле издавани фискални сметки
Дали со касов извештај приходите завршувале на банкарска сметка на здружението „Охрид Трчат”

Посебно внимание се посветува на можниот судир на интереси, со оглед на тоа што претседателот на невладината организација „Охрид Трчат” е вработен во ЈП Билјани Извори, од каде што здружението добива субвенции, што е спротивно на законот.
Дополнително се истражува улогата на прикриениот сопственик и оснивач на невладината „Охрид Трчат” кој од позиција на раководител на сектор за општествени дејности во Општина Охрид, под чија надлежност е и одделението за спорт, наводно доделувал проекти на своето здружение и преземал други сомнителни дејствија.
Се очекува институциите да излезат со целосен извештај за финансиското работење на здружението и да утврдат дали постојат законски неправилности во неговото работење.