Американската веб-страница „Дејли бист“ денес пишува дека кога еден новинар го прашал: „Кого го гледате како папа?“ Американскиот претседател Доналд Трамп во вторник без двоумење одговори: „Како папа? Би сакал да бидам папа“.
„Тоа би бил мојот избор број еден“, додаде тој.
Новинарот повторно го праша Трамп кого би сакал да го замени папата Франциск, кој почина минатиот понеделник на 88-годишна возраст. „Не, не знам, немам преференции“, рече Трамп, а потоа го пофали надбискупот на Њујорк, кардиналот Тимоти Долан.
Трамп се смета себеси за „христијанин кој не припаѓа на ниедна посебна група (деноминација)“ во рамките на таа религија.
Папата ќе биде избран од претстојната конклава од 135 кардинали на Католичката црква со право на глас – најмногу во нејзината историја. Кардиналите под 80 години можат да изберат и да бидат избрани за нов папа. Конклавата – сесија на кардиналите во Систинската капела во Ватикан, затворена за јавноста, започнува следната среда, 7 мај.
Кардиналите гласаат тајно онолку пати колку што е потребно за папата да биде избран со двотретинско мнозинство. Тие го пишуваат името на кандидатот што го сакаат на ливчињата.
Првото гласање, по сложена постапка, би можело да се одржи на 7 мај навечер, а во следните денови се можни до четири гласања дневно – две наутро и две попладне.
По неуспешното гласање, од оџакот на Систинската капела излегува црн чад, а штом ќе биде избран папата, чадот ќе биде бел. Чадот се создава со горење на гласачки ливчиња измешани со хемикалии за да се направат црни или бели.
Папата Франциск беше избран во 2013 година на вториот ден од конклавата, на петтото гласање на кардиналите од почетокот на процесот.
Изборот на папата ќе одреди дали Католичката црква ќе продолжи по релативно прогресивниот пат што го зацрта папата Франциск или ќе се врати на по традиционалната доктрина, заклучува „Дејли бист“.
