Швајцарија планира да го намали бројот на земји на кои им обезбедува помош за развој од сегашните 34 на 21 приоритетна земја од 2029 година

Швајцарија планира да го намали бројот на земји на кои им обезбедува помош за развој од сегашните 34 на 21 приоритетна земја од 2029 година, потврди денеска швајцарското Министерство за надворешни работи.

Швајцарската агенција за развој и соработка (SDC) планира да се повлече од неколку земји со среден приход, објави Swissinfo.

Познати имињата на некоои од земјите за кои запира помошта

Весникот „Сонтагс Цајтунг“ објави дека Непал, Ерменија, Грузија, Зимбабве, Танзанија и Тунис би можеле да бидат меѓу земјите опфатени со промените.

- Advertisement -

Според весникот, SDC исто така планира да го намали бројот на мултилатерални организации што ги поддржува од 24 на 18.

Портпаролот на Министерството за надворешни работи потврди дека раководството на Швајцарската агенција за развој и соработка подготвило почетен план за спроведување на одлуката на швајцарската влада од 24 јуни.

Според официјалниот список, 21 земја ќе биде приоритетна, додека Швајцарија ќе продолжи да обезбедува помош за шест хуманитарни области погодени од долгорочни кризи, иако тие не се меѓу приоритетните земји.

Помошта за Украина и зголемување на воениот буџет

Швајцарија ја намалува и ја реструктурира својата развојна помош главно поради пренасочување на буџетските приоритети кон војната во Украина, зголемување на воениот буџет и фокусирање кон итна хуманитарна помош наместо долгорочни проекти. Швајцарија издвојува околу 1,5 милијарди франци за реконструкција на Украина, како и за зајакнување на сопствената воена одбрана, што наметна кратења во други сектори.

Парламентот го намали буџетот за меѓународна соработка за 110 милиони швајцарски франци за 2025 година, со дополнително замрзнување на 321 милион франци за периодот од 2026 до 2028 година.

Македонија има договорени програми до 2028 година

Македонија моментално се наоѓа на списокот на приоритетни земји на Швајцарија за меѓународна соработка. Швајцарија неодамна ја лансираше својата нова Програма за соработка со Северна Македонија за периодот 2025–2028 година, со планиран буџет од 56,1 милион швајцарски франци. Овие средства се наменети за поддршка на реформите за евроинтеграција, демократското владеење, одржливиот економски развој и заштитата на животната средина.

Регионот на Западен Балкан традиционално е важен за Швајцарија, но долгорочниот статус на развојните програми по 2028 година ќе зависи од економскиот напредок на Македонија и натамошните одлуки на швајцарскиот Парламент.