Прашање на денови е кога ќе се пушти пругата кон Бугарија, долга 30 километри

Пуштање на првата фаза од експресниот пат Прилеп-Градско и пругата кон Бугарија на потегот од Куманово до Бељаковце, како и за моменталните активности на автопатот Охрид-Кичево, беа дел од темите за кои зборуваше вицепремиерот и министерот за транспорт Александар Николоски во Вечерното шоу на Богдан Илиевски.

Во однос на изградбата на првата фаза од пругата кон Бугарија, министерот истакна дека изградбата е во крајна фаза и во прашање се денови кога ќе се пушти во употреба оваа пруга во должина од 30 километри.

– Пругата е веќе при крај и во многу брз период ќе биде пуштена, со што ќе имаме целосно функционална пруга од Скопје, преку Куманово до Бељаковце. Успеавме да ги придвижиме работите заедно со директорот на ЈП Железници – инфраструктура и работите на вториот дел од делницата, а тоа е од Бељаковце до Крива Паланка, или за делница во должина од 34 километри, која очекувам да е готова некаде до 2027 година и потоа ќе остане третиот дел кој ќе треба да значи поврзување со Бугарија, кога ќе успееме технички да ги затвориме тие работи – истакна министерот Николоски.

- Advertisement -

Во однос на изградбата на автопатот Охрид-Кичево, Николоски потсети дека пред почетокот на летната сезона годинава, ќе биде пуштен во употреба најголемиот дел од трасата на автопатот или околу 40 километри, а истиот ќе биде завршен до крајот на 2026 година.

Министерот Николоски зборуваше и за активностите на изградбата на коридорот 10д, каде што во моментов се завршени работите околу изградбата на првата фаза од експресниот пат Прилеп-Градско, на потегот од Градско до Дреново.

–  Првата фаза е речиси готова и во наредните денови ќе следува пуштање во употреба. Втората фаза ќе биде готова до март месец годинава – истакна тој и додаде дека со изградбата на овој патен правец и на автопатот Прилеп-Битола, Пелагонија ќе доживее целосна ренесанса и ќе добие модерно и брзо поврзување со останатиот дел од државата.