По инцидентот во авионот на Флајдубаи, експертите открија сериозни недостатоци во воздухопловната безбедност

Експертите за безбедност во воздухопловството предупредуваат дека насилниот инцидент на летот на „Флајдубаи“ (Flydubai) минатата недела откри сериозни безбедносни пропусти кои овозможиле да дојде до таков настан – напад од копилот врз пилот. Тие истакнуваат дека проверките на минатото на вработените во воздухопловната индустрија не се стандардизирани, туку се разликуваат од земја до земја, поради што авиокомпаниите понекогаш се принудени слепо да им веруваат на податоците за безбедносните одобренија на пилотите. Еден експерт за воздухопловство, исто така, смета дека секирата – која била употребена при нападот врз пилотот на „Флајдубаи“ – треба да се отстрани од пилотските кабини.

Инцидентот со летот на „Флајдубаи“, кој минатата недела беше принуден да изврши итно слетување во Обединетите Арапски Емирати (ОАЕ) додека патуваше од Дубаи кон Тел Авив поради напад во пилотската кабина, покренува прашања за тоа како авионот воопшто можел да полета, пренесува Си-Ен-Ен (CNN).

Експертите за безбедност во воздухопловството укажуваат на сериозни безбедносни недостатоци поврзани со настанот. Копилотот Хамам ал-Хамами, кој наводно го нападнал пилотот со секира за време на летот, минатата година бил отпуштен од националната авиокомпанија на Оман поради загриженост во врска со неговите екстремистички ставови, изјавиле извори за Си-Ен-Ен.

- Advertisement -

И ОАЕ и Израел имаат строги прописи за безбедност во воздухопловството, но сепак на Ал-Хамами му било дозволено да лета. Како што објасни Алекс Плицас, аналитичар за национална безбедност на Си-Ен-Ен, многу од безбедносните мерки воведени по терористичките напади од 11 септември 2001 година биле дизајнирани да спречат надворешни закани – како што се внесување бомби или други предмети во авионот, или пристап на патник до пилотската кабина. „Системот всушност не беше дизајниран со претпоставка дека пилот би направил вакво нешто“, забележа тој.

Не постои меѓународен стандард за проверки на минатото на вработените. Експертите објаснуваат дека пилотските дозволи и безбедносните одобренија се регулираат на национално ниво, при што правилата варираат од земја до земја.

Извештаите за екстремистички ставови и фактот дека наводниот напаѓач бил отпуштен од претходната работа покренаа загриженост во врска со веродостојноста на проверките на минатото на вработените во воздухопловната индустрија.

Си-Ен-Ен побара коментар од „Оман ер“ (Oman Air), Канцеларијата за медиуми на Владата на Дубаи и компанијата „Дубаи ерпортс“ (Dubai Airports Company), која управува со аеродромите во Дубаи. Во меѓувреме, авиокомпанијата „Флајдубаи“ (Flydubai) соопшти дека не може да го коментира инцидентот додека трае истрагата. Според експертот за воздухопловство Аластер Розеншајн, кој 40 години работел како пилот во Обединетото Кралство, на сите членови на летачкиот екипаж им е потребна безбедносна пропусница за аеродром, која им овозможува пристап до делови од аеродромите и авионите што се забранети за патниците. Добивањето на таква пропусница обично вклучува полициски и безбедносни проверки на минатото, иако експертите напоменуваат дека конкретната процедура зависи од прописите на поединечната земја.

Во саботата, израелското Министерство за транспорт ги информираше новинарите дека се потпира на посветеноста на странските авиокомпании кон меѓународните прописи и на потпишаните изјави со кои се потврдува дека нивните пилоти и членови на екипажот поминале соодветни безбедносни проверки.

„Потребно е да се направи многу повеќе“ во однос на проверката на вработените.
Розеншајн изјави дека нема увид во конкретните процедури во Обединетите Арапски Емирати, бидејќи надлежноста за истражување и обелоденување на такви информации им припаѓа на владата, авиокомпаниите и безбедносните служби на предметната земја. Всушност, не постои строго дефиниран или недвосмислен стандард за проверка на вработените, иако тој смета дека таков би требало да постои. „Зошто Оманците привремено не му ја одзедоа пилотската дозвола?“, прашува тој во врска со случајот на оманскиот пилот кој летал за „Флајдубаи“. Сепак, како што за Си-ен-ен (CNN) истакнува експертот за воздухопловство и британски пилот Гидеон Јуерс, пилотската дозвола во суштина е само техничка квалификација што потврдува дека поединецот знае да управува со авион. Самата дозвола не содржи информации за проблеми во претходното вработување или за какви било можни прекршоци.

Процедурите за вработување значително се разликуваат меѓу авиокомпаниите, иако – според Розеншајн – тие генерално вклучуваат некаков вид психолошка проценка, тестови на симулатор за летање и препораки од претходни работодавачи или инструктори. Од пилотите исто така се бара да поминуваат редовни медицински прегледи. Останува нејасно како напаѓачот можел успешно да ја помине безбедносната проверка доколку претходно бил отпуштен од оманска авиокомпанија поради загриженост во врска со неговите екстремистички ставови.