ОТВОРЕН АПЕЛ И СООПШТЕНИЕ ДО ЈАВНОСТА ПОРАДИ ОПАСНОСТА ОД ПОЖАРИ

Сношти бевме сведоци на уште една опасна катастрофа која можеше да заврши со кобни последици. На потегот од с. Белчишта кон Лешани и Злести, зафатени и изгорени се над 50 хектари земјоделско земјиште со висока сува вегетација.

Благодарение на ладнокрвноста, професионалноста и неуморната борба на ТППЕ Охрид (кои дејствуваа со три противпожарни возила) и екипата од „ЕНТУЗИЈАСТ ДЕБРЦА“, доцна во ноќните часови беше спречена катастрофа од поголеми размери. Со нивниот херојски соодветен одговор спасивме приватни посеви со пченка и фотонапонска централа од целосно уништување.

Како градоначалник, бев на терен рамо до рамо со овие луѓе кои го ризикуваа сопственото здравје за сите нас. Имаат моја длабока почит и огромна благодарност!

 ПРЕДУПРЕДУВАЊЕ И ИТЕН АПЕЛ ДО ЖИТЕЛИ НА ДЕБРЦА:

ПРЕСТАНЕТЕ СО ПАЛЕЊЕ СТРНИШТА!

Ова веќе не е само невнимание — ова е директно загрозување на општата безбедност! Ваквиот неодговорен однос не само што уништува децении природа, растителен и животински свет, туку ДИРЕКТНО ГИ ЗАГРОЗУВА ЧОВЕЧКИТЕ ЖИВОТИ и имотите на вашите сограѓани.

Апелирам на максимална совесност и одговорност. Секое намерно или невнимателно предизвикување пожар е злосторство против нашата општина и нема да има толеранција за загрозувањето на безбедноста на сите нас!

Огнот не избира — да бидеме разумни пред да биде предоцна!