Лихварка од Охрид е пријавена за изнуда на речиси 45 милиони денари од сограѓанин во период од четири години.
Секторот за внатрешни работи Охрид поднесе кривична пријава против М.Д.Д. (39) од Охрид, поради основано сомнение дека сторила едно продолжено кривично дело „поттикнување“ по член 23 од Кривичниот законик, во врска со кривичното дело „лихварство“ по член 260. Кривична пријава е поднесена и против Љ.Д. (35) од Охрид, кој се сомничи за сторено продолжено кривично дело „помагање“ во врска со истото кривично дело.
Според информациите на Министерството за внатрешни работи, М.Д.Д. во периодот од 2020 до 2024 година поттикнувала и примала несразмерна противправна имотна корист од лицето Б.Р. од Охрид. На овој начин, таа изнудила 44.976.415 денари, префрлајќи ги средствата на своја сметка, како и на сметките на Е.Д. и Љ.Д., двајцата исто така од Охрид.
Како што информираат од МВР, во истиот период, Љ.Д. активно помагал, договарал, примал и посредувал за добивање противправна имотна корист за себе и за М.Д.Д., при што од Б.Р. биле изнудени 26.579.000 денари.
Од МВР најавуваат дека постапуваат активно за расчистување на случаи поврзани со лихварство и повикуваат граѓаните да пријавуваат вакви кривични дела за да се заштитат од незаконски финансиски злоупотреби.
