ОСУМГОДИШНО ДЕТЕ КАЖА ШТО ИСКРЕНО МИСЛИ ЗА МАКРОН

Осумгодишно момче предизвика непријатна ситуација во директен телевизиски пренос од протестите во Париз, откако го нарече францускиот претседател Емануел Макрон „кретен“. Новинарката на францускиот јавен сервис Франс Инфо се обиде да го прекине навредливиот говор, но детето продолжи, по што телевизијата јавно се извини.

Момчето присуствувало на протестната прошетка со својот татко, кој претходно разговарал со репортерот за причините поради кои излегол на улица, објави „Ле Фигаро“.

Таткото објаснил дека на протестот дошол главно поради средношколците и студентите, надевајќи се дека владата ќе покаже поголемо разбирање за нивните барања.

- Advertisement -

– Единствениот што не слуша е Макрон. Макрон, мора да ги слушаш младите луѓе, тоа е најважното нешто – рекол тој, додавајќи дека сака францускиот претседател што поскоро да ја напушти функцијата.

Кога новинарката му го подала микрофонот на осумгодишното момче, одговорот бил уште поостар.

– Мислам дека Макрон е кретен, како сите тие лоши полицајци – рекло детето.

Репортерката се обидел да го предупреди дека во програма во живо не треба да се користат навредливи зборови. Момчето, сепак, продолжило со критиките и навредите кон претседателот, а неговиот татко на крајот го прекинал разговорот.

По реакциите на јавноста, раководството на Франс Инфо објави извинување поради емитувањето на изјавите на детето.

„Раководството на Франс Инфо жали што детето даде навредливи коментари во живо за време на демонстрациите. Иако водителот одговори на овие коментари, не требаше да му дадеме простор на детето. Упатствата во овој поглед беа повторени“, се наведува во соопштението.

Протестите во Париз и во други француски градови се одржаа во саботата, четврти викенд по ред, поради високите трошоци за живот, намалената куповна моќ и барањата за поголеми инвестиции во образованието.

Според проценките на синдикатите, на протестниот марш во Париз учествувале околу 75.000 луѓе, додека на ниво на целата земја бројот на демонстранти се движел меѓу 146.000 и 250.000.