Останува забраната за носење брада во АРМ, Уставниот суд не поведе постапка

Војниците мора да се уредно избричени, останува одредбата дека им е забрането да носат брада, а можат да носат мустаќи.

Уставниот суд денеска не покрена постапка за оценување на уставноста и на законитоста на параграфот број 7 од Правилото за односите во вршењето на службата на Армијата на Македонија, донесено во јули 2012 година од Началникот на Генералштабот.

Во оспорениот параграф е наведено дека воениот персонал на служба на АРМ мора секогаш да биде уредно облечен, избричен и потстрижен.

- Advertisement -

„Се потстрижуваат средно зулфите, до половина на увото, а косата да не паѓа на ушите и јаката на облеката, односно да не се витка преку работ на капата, шапката или баретката. Не смее да носи брада, а ако носи мустаќи, треба да бидат долги 0,8 сантиметри од горната уста и не смеат да преминуваат преку неа. Косата не смее да биде подолга од 5 сантиметри“, се вели во оспорената одредба.

Подносител на иницијативата е Здружението за развој Млади за јавен интерес, од Дебар.

„Подносителите наведуваат дека прашањето за носење брада е правно допуштено со Уставот и со Европската конвенција, а ваквата одредба претставува мешање во правото на приватен живот. Се наведува дека е апсурдно што не се забранува носење на бркови, а притоа постои апсолутна забрана за носење на брада“, соопшти Уставниот суд.