Дали Украина ќе изгуби клучен сојузник поради Зеленски?

Јужна Кореја денес предупреди на „дополнителни мерки“ доколку Украина не се извини за обелоденувањето на информацијата дека им ги предала севернокорејските воени заробеници на властите во Сеул. Сеул веќе го повика украинскиот амбасадор на разговор поради ова откритие, за кое смета дека може да ги загрози семејствата на заробениците во Северна Кореја.

„Ако Украина продолжи да одбива да ги признае фактите и да упати јавно извинување, ќе преземеме дополнителни мерки“, изјави јужнокорејскиот претседател Ли Џе-мјунг, обвинувајќи го Киев дека го прикажува како „лажго“ преку негирањето на фактите. „Ова е инцидент што се однесува на достоинството на Република Кореја и нејзините граѓани и не можеме да го занемариме“, додаде тој.

Ли не прецизираше што би можеле да опфатат „дополнителните мерки“ на Сеул, пренесува француската новинска агенција АФП. Сепак, тој уште минатата недела истакна дека прашањето за предавање на севернокорејските воени заробеници на Јужна Кореја е исклучително чувствителна тема што може да има значителни последици за дипломатијата, безбедноста и ситуацијата на Корејскиот Полуостров. Дипломатскиот спор меѓу двете земји беше поттикнат од говорот на украинскиот претседател Володимир Зеленски; минатата недела, на Генералното собрание на ОН, тој откри дека Украина испратила двајца заробени севернокорејски војници во Јужна Кореја. Јужна Кореја тврди дека постоел договор за доверливост со Украина во врска со ова прашање – нешто што Киев официјално не го потврди.

- Advertisement -

Во меѓувреме, во четвртокот, украинскиот министер за надворешни работи Андриј Сибиха изјави дека „не би го нарекол ова инцидент“, туку „дипломатско недоразбирање“. „Сакам оваа ситуација да се реши што е можно поскоро и работиме на тоа. Јужна Кореја е важна земја за нас“, додаде тој. Москва и Пјонгјанг потпишаа договор за заемна воена помош во 2024 година, а Северна Кореја, наводно, испратила – меѓу другото – илјадници војници во Русија, која е во војна со Украина од 2022 година.