Македонија сака уште повеќе туристи од Европа

Можностите за продлабочување на соработката во авиосообраќајот и туризмот биле тема на работната средба на вицепремиерот и министер за транспорт Александар Николоски со претставници на меѓународната туристичка групација „Корендон“.

На средбата Николоски го истакнал потенцијалот на Македонија како туристичка и авио-дестинација, посочувајќи дека земјата бележи континуиран раст на воздушниот сообраќај и на бројот на странски туристи.

Според него, Македонија бележи 40 проценти раст на бројот на патници во воздушниот сообраќај, а бројот на туристи е зголемен за повеќе од 20 проценти.

- Advertisement -

– 28 нови дестинации, растот од 40 проценти во авиосообраќајот, преку 20 проценти раст на туристите е јасен показател дека интересот за Македонија расте. Нашата цел е овој тренд да го претвориме во нови авиолинии, повеќе туристи и нови инвестиции и отворени сме за соработка – истакнал Николоски.

На состанокот било посочено дека подобрата авио-поврзаност и отворањето нови пазари и услуги се особено важни за натамошниот развој на туризмот и зголемувањето на бројот на странски посетители.

„Корендон“ е меѓународна туристичка групација која, според податоците од македонското Министерство за транспорт, е меѓу трите водечки туроператори во Холандија и Белгија. Компанијата нуди пакет-патувања до повеќе од 50 дестинации.

Групацијата располага со повеќе од 40 авиони, кои летаат под знамињата на Турција, Холандија и Малта. Во туроператорскиот сегмент годишно опслужува околу 850.000 клиенти, додека „Корендон ерлајнс“ годишно превезува меѓу 6 и 10 милиони патници.

На средбата било заклучено дека постои простор за идна соработка, особено преку отворање нови можности во авиосообраќајот, привлекување странски туристи и разгледување потенцијални инвестиции во земјава.

Засега, меѓутоа, не е соопштено дека е договорена конкретна нова авиолинија, дестинација или инвестиција, туку дека можностите ќе бидат дополнително разгледувани.