Кејн триумфираше во една од најнеизвесните трки во историјата

Хари Кејн ја освои „Златната топка“ за 2026 година, но објавените резултати од гласањето откриваат дека трката со Килијан Мбапе била една од најнеизвесните во историјата на престижното фудбалско признание. Англискиот напаѓач триумфирал со само 28 поени предност пред француската ѕвезда.

Напаѓачот на „Баерн Минхен“ освоил вкупно 1.055 поени, додека Мбапе, кој заврши на второто место, добил 1.027. Деталите од гласањето ги објави „France Football“, а резултатите покажуваат колку мала била разликата меѓу двајцата фаворити.

Кејн бил избран за најдобар фудбалер на светот на 40 гласачки листи, додека Мбапе добил максимален број поени од 23 новинари. Французинот, сепак, не успеал да го надомести заостанувањето во вкупниот број гласови.

- Advertisement -

Според објавените податоци, ова е четвртата најмала разлика меѓу првопласираниот и второпласираниот во историјата на наградата. Неизвесноста траела до самиот крај, а во Франција се наведува дека Мбапе во еден период бил во подобра позиција, пред Кејн да направи пресврт во завршницата на гласањето.

На третата позиција заврши Ламин Јамал со 881 поен, додека четвртото место му припадна на Родри со 726. Лионел Меси се најде на петтата позиција со 612 поени.

Во првата десетка се најдоа и Хвича Кварацхелија со 541 поен, Усман Дембеле со 418, Ерлинг Халанд со 378, Мајкл Олисе со 296 и Фабијан Руис со 201 поен.

Особено внимание привлече и распоредот на гласовите за Јамал и Родри. Според објаснувањето на Венсан Гарсија, главен уредник на „France Football“, поддршката за шпанските репрезентативци била поделена меѓу двајцата фудбалери, што влијаело врз конечниот пласман.

Јамал бил избран за најдобар на 13 гласачки листи, додека Родри добил максимални поени од 10 новинари. Така, двајцата шпански фудбалери завршија на третото и четвртото место, зад Кејн и Мбапе.

Разликата од само 28 поени меѓу Кејн и Мбапе е помала и од онаа во 2024 година, кога Родри ја освои „Златната топка“ со 41 поен предност пред Винисиус Жуниор. Овогодишното гласање така се вброи меѓу најтесните трки за најпрестижното индивидуално признание во светскиот фудбал.