КРАЈ ЗА ДИВАТА ПРОДАЖБА КАЈ КЛИНИЧКИ И ПАЗАРИТЕ

Нелегалната улична продажба кај Клиничкиот центар, Зелениот пазар и Буњаковец беше мета на координирана инспекциска акција во Скопје, при која беа отстранети продавачите што тргуваа на јавни површини без соодветно одобрение.

Акцијата ја спровеле Инспекторатот на Град Скопје, Државниот пазарен инспекторат, Агенцијата за храна и ветеринарство и Инспекторатот на Општина Центар.

Од Град Скопје велат дека целта на засилените контроли е воспоставување комунален ред, спречување на нелегалната трговија, заштита на јавните површини и обезбедување еднакви услови за сите трговци што работат во согласност со законските прописи.

- Advertisement -

„Нема да дозволиме јавните површини да се узурпираат и да се користат за нелегална продажба“, порачаа од Град Скопје.

Оттаму најавуваат дека инспекциските контроли и координираните активности ќе продолжат и во наредниот период, со цел да се одржува комуналниот ред и да се обезбеди почитување на законите на целата територија на градот.

Со акцијата беа опфатени три од најфреквентните локации во Скопје, каде што со години се забележува присуство на улични продавачи, особено во непосредна близина на пазарите и јавните здравствени установи.