ЕДНО ДРВО ОД СЕКОГО, СВЕТСКИ РЕКОРД ЗА РОМАНИЈА

Романија го собори светскиот рекорд за најмасовно истовремено садење дрвја и се запиша во Светската книга на рекорди, откако повеќе од 2.500 волонтери, меѓу кои имало и голем број деца, истовремено засадија по едно дрво.

Светскиот рекорд беше поставен во општината Појенариј Бурчиј, во округот Прахова. Претставник на Светската книга на рекорди потврди дека секој учесник правилно ја завршил задачата, пренесува „Digi24“.

Претседателот на организацијата „Date for Tomorrow“, Андреј Косулеану, изјави дека на нивната платформа за пријавување за учество во акцијата биле регистрирани околу 4.400 волонтери, а на настанот се одзвале повеќе од 3.000.

- Advertisement -

По поставувањето на рекордот, садењето продолжило, а целта била да се создаде нова шума со засадување 35.000 садници од јасен, јавор, цреша и глог.

Претходниот светски рекорд го држеше Индија, каде што во најмасовната акција за садење дрвја учествувале околу 2.000 луѓе.