Девет возачи лишени од слобода низ целата држава

Во текот на изминатото деноноќие, полициските службеници на територијата на целата држава лишија од слобода девет возачи кои управувале возила без возачка дозвола.

Меѓу приведените има и двајца малолетници, како и едно лице кое управувало возило под дејство на алкохол.

Како што информираат од МВР, по две лица се приведени во Скопје и Прилеп, а по едно лице во Кочани, Гевгелија, Кратово, Македонски Брод (малолетник) и Кривогаштани (малолетник).

- Advertisement -

Во еден од случаите во Кратово, возачот претходно учествувал во сообраќајна незгода, додека едно од лицата во Прилеп, освен што возело без дозвола, било и под дејство на алкохол.

По целосно документирање на случаите, против сите ќе бидат поднесени соодветни кривични пријави.

Од полицијата апелираат до граѓаните да ги почитуваат сообраќајните правила, да не управуваат возила без положен возачки испит, ниту под дејство на алкохол, со цел зголемување на безбедноста во сообраќајот.