Селин Дион двапати за една недела беше на концертите на „Металика“ во Лас Вегас, а на вториот настап се сретна и со Џек Блек

Селин Дион двапати за една недела беше на концертите на „Металика“ во Лас Вегас, а на вториот настап се сретна и со Џек Блек. Двајцата беа снимени како се препуштаат на ритамот на „Enter Sandman“, а потоа следуваа и фотографии со членовите на легендарниот бенд.

Дион првпат се појави во публиката на 5 ноември, кога со своите 16-годишни близнаци Еди и Нелсон го следеше концертот во салата „Спир“. Беше сместена во ВИП-ложа на балконот, од каде што ја снимија како свири на замислен бас за време на инструменталниот дел „Kirk and Rob Doodle“, во кој главната улога ја имаат гитаристот Кирк Хамет и басистот Роберт Трухиљо.

Два дена подоцна, на 7 ноември, пејачката повторно се врати во „Спир“, овојпат на последниот концерт на „Металика“ во Лас Вегас за оваа година. Повторно беше со синовите, а во нивна близина бил и Џек Блек. Актерот, кој е и фронтмен на рок-групата „Тенешис Ди“, бил оддалечен само две седишта од Дион, па двајцата заедно уживале во изведбата на „Enter Sandman“.

- Advertisement -

Нивната спонтана реакција на музиката предизвика бројни коментари, особено поради неочекуваната комбинација на пејачката позната по романтичните балади и актерот кој со години ја спојува комедијата со рок-музиката.

По концертот, Дион и нејзините синови имале можност да се сретнат со членовите на „Металика“ и да се фотографираат со Џејмс Хетфилд, Ларс Улрих, Кирк Хамет и Роберт Трухиљо. Пејачката ги објави фотографиите на Инстаграм, заблагодарувајќи им се на музичарите за топлото добредојде.

– Имавме прекрасно време гледајќи ве во Спир. Навистина ни се допадна концертот – напиша таа. Објави и фотографија со Џек Блек од вечерта.

Љубовта на Дион кон „Металика“ не е нова. Таа претходно откри дека песната „Until It Sleeps“ од 1996 година се наоѓа на нејзината лична плејлиста, а нејзиниот син Еди е голем обожавател на бендот. Токму затоа и двата концерта биле семејно излегување за пејачката, која очигледно ужива во музиката на групата исто колку и нејзиниот син.

За Дион ова е и период на враќање кон нормалниот живот и музиката, по тешкиот период поради синдромот на вкочанета личност, ретко невролошко нарушување што предизвикува мускулна вкочанетост и грчеви. Во септември таа повторно одржа целосни концерти, започнувајќи ја својата серија настапи во Париз по повеќе од шест години пауза.