Грција победи во Халкида со 29:24

Различни ознаки за Македонија се појавија во известувањето за ракометниот натпревар меѓу Македонија и Грција, кој домаќините го добија со 29:24 во Халкида.

На графиката од преносот на грчката јавна телевизија ЕРТ стоела ознаката NMKD. За истиот дуел, во официјалната евиденција на Европската ракометна федерација (ЕHF) стои MKD.

Разликата е значајна и во контекст на Преспанскиот договор. Во член 1, став 3, точка е, договорот ги предвидува ознаките NM и NMK за регистарските таблички на возилата, додека за другите намени остануваат кодовите MK и MKD.

- Advertisement -

На својата интернет-страница, ЕРТ го најавила натпреварот со целосното име „Северна Македонија“. Засега не е утврдено дали спорната графика ја подготвила самата телевизија или била преземена од друг извор.

Македонската ракометна репрезентација го претрпе првиот пораз во квалификациите за Европското првенство во 2028 година, откако претходно го совлада Луксембург со убедливи 41:23.

Избраниците на селекторот Кирил Лазаров се доближија на 5:4, но потоа Грција направи серија од 8:2 и ја презеде контролата врз натпреварот. На полувремето домаќините водеа со 16:9.

Во второто полувреме Македонија остана без Петар Атанасијевиќ, кој доби директен црвен картон при резултат 21:15.

Грција во 53. минута поведе со 29:20, а македонските ракометари ги постигнаа последните четири гола и го ублажија поразот.

Никола Костески беше најефикасен во македонскиот состав со осум погодоци, Филип Кузмановски постигна седум, додека голманот Мартин Томовски забележа 11 одбрани.

Македонија во март ќе одигра два квалификациски натпревара со Шведска, а реваншот против Грција е закажан за 9 мај.