Поранешниот српски претседател Александар Вучиќ најави дека неговата Српска напредна странка нема да учествува на претстојните претседателски избори, порачувајќи им на победниците на парламентарните избори сами да си најдат противкандидати.
– Нека бидат сами, нека работат сами со себе, нека најдат два или три сателити кои со нив ќе трчаат на претседателските избори со по еден или два отсто – изјави Вучиќ на прес-конференција во седиштето на СНС.
Вучиќ изјавата ја даде во контекст на неговите обвинувања дека по изборниот пораз на СНС во Србија се спроведува „револуционерен терор” врз неговите сопартијци и поддржувачи. Според него, во такви услови нормалното политичко дејствување станува невозможно.
– Нашите луѓе се плашат, особено жените. Не можат да дојдат ни на работа, не сакаат некој да ги тепа, турка, удира и малтретира – рече Вучиќ.
Изборите сигурно ќе бидат распишани до 27 ноември
Пораката дека новата власт треба сама да си најде „два или три сателити” за претседателската трка доаѓа во момент кога изборите за наследник на Вучиќ веќе се најавени. Вршителката на должноста претседател Ана Брнабиќ денеска соопшти дека изборите ќе бидат распишани во законскиот рок, најдоцна до 27 ноември, доколку дотогаш тоа не го направи новиот в.д. претседател по конституирањето на новата власт.
Претседателската функција остана празна откако Вучиќ на 27 септември поднесе оставка, по што должноста привремено ја презеде Брнабиќ. Според српските закони, изборите мора да се одржат најдоцна три месеци по престанувањето на мандатот на претседателот, што значи дека крајниот рок за гласањето е 27 декември. Од распишувањето на изборите до денот на гласањето мора да поминат најмалку 30, а најмногу 60 дена.
Пратеничката група на Вучиќ ќе се вика „Србија против теророт“
Вучиќ истовремено најави големи промени во СНС по поразот на парламентарните избори. Во следниот месец треба да се одржи партиско собрание и да биде избрано ново раководство, при што, според неговата најава, две третини од членовите на Главниот одбор би требало да бидат нови луѓе, како и повеќе од половината членови на Претседателството. Тој призна дека СНС мора да ја анализира и сопствената одговорност за изборниот резултат.
Поранешниот претседател најави дека СНС сега ќе дејствува како „силна и жестока опозиција“, но тврди дека партијата нема да предизвикува нереди. Тој повторно ги обвини победниците на изборите дека го одложуваат формирањето на новата влада поради внатрешни интересни групи и борба за позиции, а пратеничката група на неговата партија најави дека ќе го носи името „Србија против теророт“.
Со најавеното повлекување на СНС од претседателската трка, изборите за шеф на државата би се одржале во сосема нов политички амбиент по парламентарниот пресврт во Србија. Победничката Студентска листа сега треба да ја формира новата власт, а истовремено Србија влегува и во нова изборна кампања – овој пат за функцијата што Вучиќ ја напушти еден месец пред парламентарните избори.
