УКИНАТИ ПРЕСУДИТЕ ЗА ПОЖАРОТ ВО КОЈ ЗАГИНАА 14 ПАЦИЕНТИ

Врховниот суд ги укина пресудите со кои поранешните директори на Клиничката болница во Тетово, Флорин Бесими и Артан Етеми, беа осудени за случајот со пожарот во модуларната болница во кој загинаа 14 пациенти, а 12 беа повредени. Предметот е вратен во Основниот суд Тетово на повторно судење и одлучување.

Одлуката е донесена на 22 октомври 2026 година, откако Советот за казниви дела при Врховниот суд ги уважил барањата на осудените за вонредно преиспитување на правосилната пресуда, поднесени преку нивните бранители.

– Советот за казниви дела при Врховниот суд на Република Северна Македонија, на седницата одржана на ден 22.10.2026 година, донесе пресуда во предметот КВП2-36/26 (во јавноста познат како Модуларна болница Тетово), со која ги уважи барањата за вонредно преиспитување на правосилната пресуда на осудените, поднесени преку нивните бранители, а пресудата на Основен суд Тетово К-512/24 од 16.05.2025 година и пресудата на Апелациониот суд Гостивар КЖ-211/25 од 26.11.2025 година, ги укина и предметот го врати на првостепениот суд на повторно постапување и одлучување – соопшти Врховниот суд.

- Advertisement -

Во истото соопштение Судот информира дека барањето за вонредно преиспитување на правосилната пресуда поднесено од обвинетото правно лице, ЈЗУ Клиничка болница Тетово, е отфрлено како недозволено.

Ова не е првпат предметот да биде вратен на повторно судење. Во декември 2025 година, Апелациониот суд Гостивар донесе одлука со која им ги зголеми казните на поранешните директори. На Флорин Бесими и на Артан Етеми казните им беа зголемени од една и пол на три години затвор, додека паричната казна за Клиничката болница Тетово беше зголемена од еден на 1,3 милиони денари.

Пожарот во модуларната болница во Тетово избувна на 8 септември 2021 година. Во трагедијата загинаа 14 лица, а 12 пациенти беа повредени. Сите жртви беа пациенти лекувани од ковид-19.

Паралелно со судскиот процес за пожарот, Обвинителството за гонење организиран криминал и корупција на 20 август 2026 година ја затвори и речиси пет години долгата предистражна постапка за набавката и изградбата на 19 модуларни болници во земјава.

Од Обвинителството тогаш оцениле дека нема докази за злоупотреба на службената положба и овластување, ниту за друго кривично дело што се гони по службена должност.