Македонија заслужува да биде со најнапредните на патот кон ЕУ

Претседателката Гордана Сиљановска Давкова на денешната средба со претседателката на Европската комисија, Урсула фон дер Лајен, изразила благодарност за растечкиот интерес и посветеност на Европската Унија кон регионот, посочувајќи го и нејзиниот личен придонес во забрзувањето на регионалните евроинтеграциски процеси.

Според Сиљановска Давкова, како што се наведува во соопштението по средбата, иако Македонија формално не е меѓу западнобалканските држави со најголем напредок, според двата клучни елементи – техничката подготвеност и геополитичката усогласеност со европската надворешна и безбедносна политика – заслужува да биде со нив, наместо на споредна патека.

„Причината за македонското отсуство од друштвото на најуспешните, за неа е во давањето примат на наметнатиот билатерален спор пред Копенхашките критериуми“, се наведува во соопштението.

- Advertisement -

Претседателката изразила цврсто уверување дека гарантирањето исти можности за Македонија како оние што ги имаат Украина и Молдавија со сигурност би ја зајакнало институционалната подготвеност на земјата, а воедно би ја обновило довербата и мотивацијата за европеизација и би го забрзало реформскиот курс.

Сиљановска Давкова потсетила и на потребата да се одржи политичка Меѓувладина конференција, согласно новата методологија и Преговарачката рамка, како и редовен состанок на Советот за стабилизација и асоцијација.

Таа ја нагласила важноста од практикување на суштински и динамичен интеграциски процес, кој ќе резултира со видливи резултати за македонските граѓани.

Од друга страна, според соопштението, претседателката на Европската комисија истакнала дека местото на Македонија е во Европската Унија и дека Брисел ќе продолжи сестрано да ја поддржува земјата на реформскиот и евроинтеграцискиот пат, оценувајќи ги досегашните реформи како импресивни.

Фон дер Лајен, како што се наведува, укажала и на неопходноста од деблокирање на напредокот на Македонија кон ЕУ, во духот на европските вредности.

Таа изразила уверување дека македонско-бугарскиот спор може да се надмине преку интензивни и сестрани средби и дијалог, кои, како што е наведено во соопштението, треба да започнат што е можно поскоро.

Средбата меѓу Сиљановска Давкова и Фон дер Лајен се одржа во рамки на официјалната посета на претседателката на Европската комисија на Македонија на 2 октомври. Посетата е дел од нејзината регионална турнеја низ Западен Балкан, при што во Скопје таа остварува средби и со премиерот Христијан Мицкоски.