Глобално истражување: САД се посочени како најголема закана во 15 земји, а Русија во 14.

Новото истражување опфати повеќе од 35.000 луѓе во 34 земји и покажа силна поддршка за меѓународна соработка и зголемена доверба во глобалните институции, додека испитаниците покажаа значително помал ентузијазам за тоа САД или Кина да преземат водечка улога во светските случувања.

Студијата, нарачана од Фондацијата „Рокфелер“, беше спроведена во периодот од 21 јули до 5 август. Речиси 70 отсто од испитаниците сметаат дека глобалната ситуација се влошила во текот на изминатата година.

Само 38 отсто очекуваат економијата на нивната земја да се подобри во рок од пет години. Оптимизмот нагло опадна во две големи економии: пад од 26 процентни поени на 50 отсто во Индија и пад од 16 поени на 56 отсто во Кина.

- Advertisement -

И покрај овој песимизам, 57 отсто од испитаниците сметаат дека нациите треба да соработуваат за справување со глобалните предизвици – како што е безбедноста – дури и ако тоа бара правење компромиси со одредени национални интереси. Минатата година, 55 отсто од испитаниците го делеа ова мислење.

Само 39 отсто ја поддржуваат водечката улога на САД
Резултатите укажуваат на резервираност во однос на тоа двете најголеми светски економии да преземат водечка улога.

Дури 61 отсто од испитаниците ја поддржуваат идејата нациите да соработуваат без вклученост на САД или Кина.

Канада го забележа најголемиот удел на испитаници – 60 отсто – кои би се чувствувале пријатно таа земја да има водечка улога во светските случувања. По неа следуваат Јапонија со 58 отсто и Австралија со 55 отсто. Европската Унија доби 55 отсто, Велика Британија 54 отсто, а Обединетите нации 52 отсто.

Од друга страна, само 39 отсто од испитаниците изјавиле дека би се чувствувале пријатно САД да имаат водечка улога, а 37 отсто истото го рекле за Кина. За Русија, таа бројка изнесуваше 26 отсто.

Ерик Пелофски, потпретседател на Фондацијата „Рокфелер“, ги опиша резултатите како показател за „длабока ерозија на глобалното лидерство“ на САД.

„Луѓето дискутираат за решенија за глобалните проблеми и веќе не прашуваат што мислат Американците. Тоа е тежок удар“, рече тој. Прашањето за тоа колку испитаниците би се чувствувале пријатно одредени земји да имаат водечка глобална улога не беше поставено во минатогодишното истражување, па затоа не постои директна споредба за овие резултати.

Големи разлики меѓу развиените земји и земјите во развој
Ставовите значително се разликуваат меѓу испитаниците од развиените економии и оние од земјите во развој.

Во земјите во развој, 53 отсто од испитаниците изјавиле дека би се чувствувале пријатно Кина да има водечка улога, во споредба со само 23 отсто во побогатите нации. Разликата меѓу двете групи изнесувала 27 процентни поени во однос на Русија и 17 поени за САД.

Истовремено, довербата во меѓународните институции е зголемена. На Светската здравствена организација ѝ веруваат 69 отсто од испитаниците (зголемување од 61 отсто минатата година), додека довербата во Обединетите нации пораснала од 58 на 62 отсто. Довербата во Светската банка се зголемила од 46 на 55 отсто, во Меѓународниот монетарен фонд од 43 на 51 отсто, а во Меѓународниот кривичен суд од 48 на 54 отсто. Светската трговска организација забележала пораст од 50 на 57 отсто.

Кого испитаниците го сметаат за закана?
Ако се исклучат оценките на испитаниците за нивните сопствени земји, 42 отсто ја сметаат Русија за голема закана, 34 отсто – САД, а 30 отсто – Кина.

Русија најчесто била посочувана како земја што претставува најголема закана во 14-те анкетирани земји, при што најголем удел на вакви одговори е забележан во Европа.

Сепак, САД биле посочени како најголема закана во 15 земји. Најголем удел на вакви одговори е регистриран во Индонезија, каде што 73 отсто од испитаниците ги посочиле САД на овој начин, по што следат Бразил (59 отсто), Мексико (58 отсто) и Турција (57 отсто).

Истражувањето беше објавено пред седницата на Генералното собрание на ОН во Њујорк, по неколкумесечната војна на Блискиот Исток, пореметувањата на пазарот на енергенси и трговските тензии.