За три месеци се завршени градежни работи во вредност од 242 милиони евра

Растот од 22% во градежништвото е историски највисок квартал, оцени денеска вицепремиерот и министер за транспорт Александар Николоски кој присуствуваше во Куманово на примопредавање на новите комунални возила набавени од Светска банка.

Николоски истакна дека се работи за исклучително висок раст, и раст кој што не е феномен само за вториот квартал, туку е континуитет уште од минатата година.

-Ние во 2024 година ги поставивме темелите, ги поставивме проектите и веќе од 2025 гледаме силен развој во делот на градежништвото. Секој квартал е далеку, далеку над она што било просек претходно. Ова е историски највисок квартал- рече Николоски.

- Advertisement -

Министерот за транспорт посочи дека на терен се завршени градежни работи со вредност од 242 милиони евра и тоа за само 3 месеци, а како што рече „споредено со истиот период минатата година, растот е околу 22%, а и минатата година имаше раст“.

-Навистина градежништвото станува основен двигател на економијата и ќе продолжиме тоа да го правиме во следниот период – да реализираме уште доста бројни проекти кои што ќе значат сериозен раст на градежништвото, а со тоа и на бруто-домашниот производ- рече Николоски.