Романската нуклеарна централа „Чернавода“ утрово започна постапка за контролирано исклучување на вториот реактор поради континуираниот и значителен пад на нивото на водата во реката Дунав

Романската нуклеарна централа „Чернавода“ утрово започна постапка за контролирано исклучување на вториот реактор поради континуираниот и значителен пад на нивото на водата во реката Дунав.

Како што е соопштено од компанијата „Нуклеарелектрика“, се очекува централата околу 11 часот по локално време да престане да испорачува електрична енергија во националниот електроенергетски систем.

„Одлуката за контролирано исклучување на втората единица е донесена поради континуираниот и значителен пад на нивото на Дунав“, се наведува во соопштението на компанијата доставено до Букурештанската берза.

- Advertisement -

Во соопштението се додава дека исклучувањето на вториот реактор се спроведува согласно пропишаните процедури, со строго следење на безбедносните маргини, опремата и прогнозите на романскиот Национален институт за хидрологија и управување со водите за наредните денови.