Скандалот со Фоларин Балогун повторно го стави Џани Инфантино во центарот на светскиот фудбалски хаос

Скандалот со Фоларин Балогун повторно го стави Џани Инфантино во центарот на светскиот фудбалски хаос. Американскиот претседател Доналд Трамп призна дека лично побарал преиспитување на црвениот картон, ФИФА ја укина суспензијата, а УЕФА порача дека е премината „црвената линија“.

Сега прашањето веќе не е само дали Балогун требало да игра против Белгија или повикот од страна на Трамп, туку, кој е човекот што ја води ФИФА?

Од ждрепки до врвот на ФИФА

Џани Инфантино беше избран за претседател на ФИФА на 26 февруари 2016 година, по падот на ерата на Сеп Блатер и големиот корупциски потрес во светската фудбалска организација. Пред тоа беше генерален секретар на УЕФА и човек што пошироката публика најмногу го паметеше по ждрепките за Лигата на шампиони.

- Advertisement -

Во ФИФА влезе како реформатор. Организацијата тогаш имаше оштетен углед, притисок од американските истраги и сериозна потреба од враќање доверба.

Инфантино вети повеќе транспарентност, повеќе пари за националните федерации и поголеми натпреварувања.

Пари, турнири, поголема империја

Десет години подоцна, ФИФА под Инфантино е финансиски посилна и многу поголема. Светското првенство е проширено на 48 репрезентации, клупскиот мундијал доби нов формат, а приходите на ФИФА за циклусот 2023-2026 се очекува да достигнат 13 милијарди долари.

Преку програмата „ФИФА Форвард 3.0“, секоја членка може да добие до 8 милиони долари за циклусот 2023-2026, додека конфедерациите добиваат до 60 милиони долари. Тоа е една од причините зошто Инфантино и понатаму има силна поддршка надвор од Европа.

Парите се неговата најсилна политичка валута.

И токму тие пари ја објаснуваат неговата отпорност на критики.

Катар, Саудиска Арабија и спектаклот

Но, најголемите контроверзии околу Инфантино не почнаа со Балогун.

Тие се влечат од Катар, од проширувањето на календарот и од одлуката Саудиска Арабија практично да добие чист пат кон Светското првенство во 2034 година. Инфантино често беше критикуван дека ФИФА под негово водство сè повеќе личи на глобална корпорација, а сè помалку на чувар на играта.

Пред Мундијалот во Катар, тој ја бранеше организацијата од западните критики и одржа говор што стана еден од најцитираните моменти во модерната историја на ФИФА. Многумина го видоа како храбра одбрана на домаќинот.

Други како политички театар.

Судир со фудбалските синдикати

Проширениот клупски мундијал дополнително го засили судирот со синдикатите на играчите. Претседателот на светскиот фудбалски синдикат ФИФПро, Серџо Марки, минатата година жестоко го нападна новиот формат и ја спореди логиката на натпреварувањето со „леб и игри“ од времето на Нерон.

Критиката беше јасна. ФИФА сака повеќе натпревари, повеќе приходи и поголем спектакл.

Играчите бараат повеќе одмор, помалку товар и погласно место на масата.

Трамп како најопасен тест

Но случајот „Балогун“ е поинаков. Овојпат не станува збор само за календар, пари или организација. Станува збор за впечаток дека политички повик од Белата куќа можел да се најде премногу блиску до дисциплинска одлука на Светско првенство.

Трамп тврди дека само побарал преиспитување. Инфантино вели дека телата на ФИФА се независни. УЕФА, Белгија и други критичари гледаат преседан што го поткопува натпреварувањето.

Токму тука лежи најголемиот ризик за Инфантино. Неговата моќ се гради врз идејата дека ФИФА е глобална, богата и автономна организација.

Случајот „Балогун“ ја отвори спротивната дилема.

Колку е автономна ФИФА кога телефонски повик од претседател на држава станува дел од фудбалска пресуда?

Џани нема сериозен противник?

И покрај сите контроверзии, Инфантино и понатаму стои цврсто на врвот. Тој беше реизбран без противкандидат во 2019 и во 2023 година, а веќе најави дека ќе бара нов мандат во 2027 година.

Во Европа го критикуваат. Надвор од Европа многумина го поддржуваат.

Формулата е едноставна.

Инфантино носи пари, проекти и поголемо присуство за федерации кои долго се чувствувале како периферија на светскиот фудбал. Затоа, дури и кога критиките звучат гласно, бројките во ФИФА често зборуваат во негова корист.