Kир Стармер се вклучил во битката со ФИФА за мечот Англија-Мексико

Само ден по бурата околу Фоларин Балогун и признанието на Доналд Трамп дека побарал ревизија на суспензијата на американскиот напаѓач, се појави нов пример за политичко вклучување во фудбалските прашања. Британскиот премиер Кир Стармер откри дека лично поддржал иницијатива за ФИФА да не го менува терминот на натпреварот меѓу Англија и Мексико на Светското првенство.

Британскиот премиер изјавил дека неговата влада застанала зад барањето на Фудбалската асоцијација на Англија натпреварот да остане во првично закажаниот термин.

– Моравме да се бориме со ФА за да го вратиме таму каде што беше – изјавил Стармер на прием во Даунинг стрит.

- Advertisement -

Според британските медиуми, во процесот биле вклучени и Министерството за надворешни работи и британската дипломатска мрежа во Мексико.

ФИФА сакала да го помести мечот

Причина за спорот биле најавените грмотевици и опасноста од невреме околу стадионот „Ацтека“ во Мексико Сити.

ФИФА размислувала натпреварот да почне дури 6 часа порано, но тоа предизвикало отпор и кај англиската и кај мексиканската федерација.

Главната грижа била дека илјадници навивачи веќе имале организирано патувања и сместување според првичниот термин.

По пет часа неизвесност следел пресврт

По повеќечасовни разговори и консултации, ФИФА се откажала од идејата за поместување на почетокот на натпреварот.

Сепак, временските услови на крајот сепак влијаеле врз организацијата и почетокот бил одложен за еден час.

Англија подоцна славеше со 3-2 и обезбеди место во четвртфиналето против Норвешка.

Ново масло на огнот по случајот „Балогун“

Откритието на Стармер доаѓа во момент кога ФИФА е под силен притисок поради случајот со Фоларин Балогун.

Прво се појавија информации дека Белата куќа контактирала со ФИФА. Потоа Доналд Трамп јавно призна дека побарал преиспитување на црвениот картон и суспензијата на американскиот напаѓач. Подоцна и Џани Инфантино потврди дека разговор навистина имало, но инсистираше дека немал никакво влијание врз конечната одлука.

Случајот предизвика остри реакции од УЕФА, која оцени дека со укинувањето на суспензијата била премината „црвената линија“, а сега новата епизода со Англија дополнително ја отвора дебатата за тоа колку политиката се приближува до одлуките во светскиот фудбал.