Кој управува со Република Србија? Криминалното крило на СНС и Александар Вучиќ влезени во сите пори на општеството

Сите држави имаат криминал, тоа е факт кој никој не го негира. Но во Република Србија ситуацијата отстапува од вообичаеното, таму криминалците немаат само свои интереси во системот, туку имаат сопствена држава во државата. Институциите, полицијата, јавните тендери, големите градежни проекти, сè е испреплетено со луѓе кои потекнуваат од земунскиот и сурчинскиот клан, или се блиски со нивните наследници.

Криминалот зад фасадата на државните проекти

Најновото истражување поврзано со изградбата на меѓународниот проект Експо 2027 покажува колку длабоко криминалното крило е всадено во државните работи. На градежните активности околу овој национален проект се ангажирани фирми поврзани со сестра на познат навивач близок до синот на претседателот, осуден член на интернационална група специјализирана за грабежи на накит, лице правосилно осудено за помагање во прикривање на убиец, како и поранешен водач на навивачка група осуден за убиство на странски државјанин.

Покрај нив, дел од работите на овој проект ги добива и потпретседател на управен одбор на голем фудбалски клуб, бизнисмен познат во јавноста по милионски набавки на возила за министерството за внатрешни работи. Друга фирма која учествува во инфраструктурните работи се поврзува со поранешен водач на меѓународна криминална група за трговија со дрога, кој подоцна станал и сведок соработник во случај поврзан со убиство на премиер.

- Advertisement -

Овие случаи воопшто не се изолирани појави, тие се само најнов и најсвеж доказ дека границата меѓу државните институции и криминалните структури во Србија одамна е целосно избришана.

Изјавите на Медени за криминалот во Србија

Лицето познато во јавноста под прекарот Медени, односно Милош Меденица, во последните месеци објавува серија видео обраќања во кои директно го обвинува Александар Вучиќ и неговиот режим за поврзаност со организираниот криминал на највисоко ниво. Тој тврди дека Вучиќ е шеф на мафијата поврзана со СНС и дека голем дел од тешките кривични дела во земјата водат до неговото обкружување.

Според наводите на Меденица, високи полициски функционери биле наградувани со советнички и раководни позиции откако нивните дејствија донеле политичка корист за режимот. Тој наведува конкретен пример со поранешен началник на белградската полиција, кој по обвинувања за прикривање на убиство бил преместен, наместо отстранет, додека на негово место дошол човек поврзан со други спорни фигури во правосудниот систем.

Меденица во своите обраќања тврди дека истраги околу одредени убиства биле однапред договорени меѓу врвот на власта и врвот на полицијата, дека биле одредувани рокови за прикривање на докази, и дека сведоците биле принудувани да молчат под закана од одмазда. Тој повикува на целосно разоткривање на врските меѓу полицијата и криминалните групи, тврдејќи дека јавноста заслужува да знае колку длабоко криминалот е всаден во секојдневното функционирање на државата.

Во истиот контекст, и други јавни личности во Србија ја опишуваат моменталната ситуација како спој на криминал и власт каков што ретко се среќава, оценувајќи дека земјата станала привлечно место за криминалци од целиот регион, токму поради тесната поврзаност меѓу врвот на власта и организираниот криминал.

Заклучок

Сликата која се добива од сите овие случаи е сосема јасна, во Република Србија границата меѓу власта и криминалот практично не постои. Додека во другите држави криминалот се бори против системот и се крие од институциите, во Србија криминалот е дел од самиот систем, вграден во неговите темели. Според изјавите на Меденица и согласно сите досегашни истражувања, токму Александар Вучиќ стои на врвот на таа мрежа, а криминалното крило на СНС служи како нејзин извршен орган во секојдневното функционирање на државата.

Сашо Денесовски