ЧАРЛС МУ ПОНУДИЛ НА ХАРИ ДА СЕ СМЕСТИ ВО КРАЛСКА РЕЗИДЕНЦИЈА СО СЕМЕЈСТВОТО

Британскиот крал Чарлс им понудил на принцот Хари, на Меган Маркл и на нивните деца да престојуваат во кралска резиденција за време на планираната посета на Велика Британија во јули.

Понудата се толкува како нов обид за приближување меѓу таткото и синот по повеќегодишните тензии во британското кралско семејство.

Хари и Меган засега не одговориле дали ќе го прифатат сместувањето. Кралот и претходно му нудел на својот син престој во Бакингемската палата, но принцот ги одбивал таквите понуди.

- Advertisement -

Се очекува Хари да престојува во Лондон и во Бирмингем од 6 до 10 јули, каде ќе присуствува на повеќе настани, меѓу кои и одбележувањето на една година до Игрите „Инвиктус“ во 2027 година.

Доколку целото семејство пристигне, тоа ќе биде прва заедничка посета на Хари, Меган, принцот Арчи и принцезата Лилибет на Велика Британија по четири години.

Чарлс не ги видел внуците од 2022 година, па посетата би можела да донесе и долгоочекувана приватна семејна средба. Сепак, официјална средба меѓу кралот и принцот Хари сè уште не е потврдена.

Едно од главните отворени прашања останува безбедноста. Хари со години тврди дека не се чувствува безбедно да го донесе семејството во Велика Британија откако ја загуби полициската заштита финансирана од државата по повлекувањето од кралските должности во 2020 година.

Одлуките за дополнителна полициска заштита не ги носи кралот, туку надлежните британски институции.

Односите во кралското семејство се нарушија откако Хари и Меган се преселија во Соединетите Американски Држави, а принцот подоцна јавно зборуваше за конфликтите со својот татко и брат.

Хари и Чарлс последен пат се сретнаа приватно во септември 2025 година, по пауза од 19 месеци.