Србија би можела да оди на предвремени парламентарни избори за три до четири месеци, а претседателот Александар Вучиќ најави дека во истиот период ќе поднесе оставка на функцијата шеф на државата

Србија би можела да оди на предвремени парламентарни избори за три до четири месеци, а претседателот Александар Вучиќ најави дека во истиот период ќе поднесе оставка на функцијата шеф на државата. Вучиќ изјави дека веќе се подготвува за заминување од претседателската резиденција и дека за својата одлука навреме ќе ја информира јавноста.

Во интервју за белградските медиуми, српскиот претседател рече дека оставката нема да биде изненадување и дека таа е дел од неговите политички планови за наредниот период.

– Планирам да поднесам оставка, ќе ве известам за тоа, нема да има изненадување за никого – изјави Вучиќ.

- Advertisement -

Тој откри дека веќе почнал да ги пакува книгите од претседателската резиденција, што дополнително ги поттикна шпекулациите дека неговото повлекување од функцијата е сериозно и непосредно. Вучиќ додаде дека оставката може да се случи и порано од рокот што го спомена.

Според неговите најави, по заминувањето од претседателската функција можно е да се кандидира за премиер на Србија. Тој потврди дека секојдневно размислува за таква можност, што во српската јавност се толкува како обид да го задржи политичкото влијание и по истекот на вториот претседателски мандат.

– Секој ден размислувам за кандидатура за претседател на Владата – рече Вучиќ, оставајќи отворена можност да ја предводи Српската напредна партија на идните парламентарни избори.

Актуелниот претседател веќе подолго време најавува дека нема намера да бара трет претседателски мандат и дека Уставот на Србија јасно го ограничува бројот на мандати. Уште во мај годинава тој изјави дека ќе ја напушти функцијата во согласност со уставните одредби.

Најавата доаѓа во период на силни политички тензии во Србија. Веќе повеќе од една година земјата е потресена од студентски и граѓански протести, кои започнаа по трагедијата на железничката станица во Нови Сад, а прераснаа во пошироко движење против власта на Српската напредна партија. Опозицијата и студентските организации подолго време бараат предвремени избори.

Вучиќ претходно најавуваше дека парламентарните избори ќе бидат распишани пред истекот на редовниот мандат во 2027 година, но сега првпат говори за многу пократок рок – од три до четири месеци. Доколку тоа се реализира, Србија би можела да гласа веќе наесен, во една од најнеизвесните изборни трки во последната деценија.

Останува да се види дали Вучиќ навистина ќе ја напушти претседателската функција и ќе влезе во трката за премиер, но неговите последни изјави јасно покажуваат дека Србија влегува во нова фаза на политичко преструктурирање, во која изборите би можеле да бидат клучен тест и за власта и за сè погласната опозиција.