Нови израелски напади во јужен Либан одзедоа 19 животи

Во израелските воздушни напади во јужен Либан во вторник загинаа 19 лица, објави либанското Министерство за здравство. Еден израелски војник беше убиен во напад на либанското движење Хезболах, според израелската војска.

Ако сакате брзо и сигурно да бидете информирани и да следите корисна и интересна содржина, изберете го N1 како ваш претпочитан извор на Google.

Десет лица, меѓу кои три деца и три жени, беа убиени во израелски напад врз куќа во градот Деир Канун ан Нахер во јужен Либан во вторник, а уште три беа ранети, објави либанското Министерство за здравство, опишувајќи го нападот како „масакр“, објавува француската новинска агенција АФП.

- Advertisement -

Во одделни израелски напади во јужниот дел од земјата, уште девет лица беа убиени, а 29 беа ранети, соопшти министерството.

Пред нападите, израелската армија издаде предупредување до жителите да ги напуштат 12-те либански градови, меѓу кои, според АФП, не е вклучен градот Деир Канун ан Нахер.

Израелски напад врз Либан
Израелската армија во вторник објави дека еден израелски војник е убиен во напад на либанското шиитско движење Хезболах, објавува британската Би-Би-Си.

Во меѓувреме, движењето Хезболах во вторник објави дека неговите борци се судриле со израелските сили кои се обидувале да напредуваат во близина на градскиот плоштад во градот Хадата. Покрај тоа, движењето тврди дека извршило неколку напади врз израелските сили во јужен Либан и дека ги таргетирало одбранбените платформи „Железна купола“ во делови од северен Израел.

Борбите повторно избувнаа во Либан на почетокот на март откако Хезболах започна напади врз Израел како одговор на нападите на САД и Израел врз Иран. Од 17 април во Либан е во сила кревко примирје, но двете страни го кршат договорот, особено на југот од земјата.