Скијачката фотографирана во инвалидска количка на аеродромот во Лос Анџелес

Американската скијачка Линдзи Вон беше фотографирана на аеродромот во Лос Анџелес во инвалидска количка, два месеци по нејзината сериозна несреќа на Зимските олимписки игри.

Вон веќе некое време се опоравува од неколку операции на кои се подложи по несреќата за време на натпреварот по спуст за жени, што резултираше со тешка скршеница на левата нога и речиси доведе до тоа лекарите да мораат да ѝ ја ампутираат ногата.

Новите фотографии ја прикажуваат скијачката ѕвезда во инвалидска количка, а персоналот на аеродромот ѝ помага да се движи. На некои фотографии е видливо дека Вон со себе има и патерици.

- Advertisement -

И покрај повредата, по која следеше долго и тешко закрепнување, Линдзи сè уште се смее.

Скијачката се опоравува од повредата што ја здоби на 8 февруари во Италија. Инцидентот ја однесе во болница, а лекарите се бореа да спречат ампутација на нејзината лева нога откако скијачката страдаше од компартмент синдром поради сложен прелом на коската, што ѝ предизвика интензивна болка. Болката ја почувствувала веќе при првото компјутерско скенирање.

– На половина од времето, почнав да се потам. Имав толку многу болки. Врескав со сета сила: „Извадете ме“. Едноставно не минуваше. Ми беше врежано во мозокот – изјави таа претходно за „Венити фер“.

Скијачката, трикратна освојувачка на златен олимписки медал, неодамна изјави и дека се борела со депресија по повредата.

– Би рекла дека дефинитивно се подобри во последниот месец, но секако имаше и навистина лоши времиња. Мразам да бидам зависна од луѓе, а бев речиси 100 проценти зависна за сè. Беше вистински предизвик, само да бидам сама во болница две и пол недели. Беше навистина тешко да бидам целосно неподвижна толку долго – изјави таа за „Пипл“.

И покрај сè што е зад неа, Вон е многу оптимистична за иднината. Таа рече дека „имала неколку убави пресвртници“ и дека „се приближува кон враќање во реалниот свет и повторно пронаоѓање на својот живот“.

Скијачката верува дека во следните шест недели ќе се опорави и ќе може да живее понормален живот. Таа исто така нагласи дека сè уште не завршила со скијањето.

– Без разлика дали е на тркачката патека или не, дефинитивно ќе се вратам – вели Линдзи.