Вучиќ за настаните во Република Српска: Можеби е најдобро да не се коментираат

Претседателот на Србија, Александар Вучиќ, во четврток вечерта во Белград изјави дека не ги следел детално настаните во Република Српска во последните денови и дека, како што рече, можеби е најдобро да не се коментираат.

Во изјава за Радиотелевизија Србија, Вучиќ рече дека „ѝ посакува се најдобро на Република Српска“, дека се надева дека „сè ќе помине мирно“ и додаде дека Србија ќе продолжи да му помага на тој ентитет во развојот на инфраструктурата.

„На Република Српска ѝ посакувам се најдобро, не разбирав сè што се случуваше. Можеби е најдобро да не коментирам ништо. Се надевам дека сè ќе помине мирно. Среќен сум кога Република Српска е среќна. Сè што можеме да помогнеме во изградбата на патишта и инфраструктура, секогаш ќе го правиме“, рече Вучиќ.

- Advertisement -

Бета потсетува дека владејачката коалиција во Република Српска, предводена од Милорад Додик, минатата недела ја назначи Ана Тришиќ Бабиќ, долгогодишна соработничка на Додик, за која медиумите известуваат дека е прозападна, за вршител на должноста претседател на ентитетот. Пратениците претходно беа информирани дека на оваа позиција ќе биде назначена Жељка Цвијановиќ, српска членка на Претседателството на Босна и Херцеговина.

Во исто време, коалицијата поништи пакет закони што Уставниот суд на Босна и Херцеговина претходно ги прогласи за антидејтонски и неуставни.

Некои медиуми ги оценија овие потези како можен почеток на спроведувањето на таканаречениот американски план за деескалација на политичката криза во Босна и Херцеговина.