Според украинските воени аналитичари, Русија формирала единици составени од војници заразени со ХИВ, хепатитис и други сериозни болести и ги испратила во битка.
Овие војници носат специјални ленти на ракавите што ги означуваат како болни, а се видени на фронтовските линии во близина на Покровск – клучен логистички центар во источна Украина, кој со месеци е цел на жестоки и исцрпувачки руски напади, пишува The Telegraph, а пренесува nova.rs.
„Во моментов, постојат информации дека овие единици учествуваат во борбите на најжешката точка на фронтот – во близина на Покровск“, рече Дмитро Змаило, извршен директор на Украинскиот центар за безбедност и соработка (USCC), организација блиска до војската.
Тој додава дека формирањето на овие единици покажува колку е длабока здравствената криза во редовите на руската армија, каде што бројот на случаи на ХИВ, хепатитис и туберкулоза нагло се зголемува. Неодамна, во една единица избувна смртоносна хеморагична треска, болест од која буквално крварат очите, па дури и руските медиуми почнаа да зборуваат за „скриена епидемија“ што ја погодува армијата.
Според USCC, „заразените единици“ биле формирани во рамките на 1435-тиот и 1437-миот моторизиран полк, кои припаѓале на 27-та и 15-та бригада. Пред да бидат испратени на фронтот, тие поминале обука во окупираните делови на Украина – Херсон, Запорожје и Крим.
Украинските војници сведочеле дека во Покровск наишле на непријател кој носел карактеристични ленти. Исто така, се потсетува дека уште во 2022 година, групата на Вагнер почнала да регрутира затвореници кои страдаат од ХИВ и хепатитис, нудејќи им антивирусни лекови како форма на плата. Оние со ХИВ носеле црвени нараквици, додека оние со хепатитис носеле бели.
„Заразените единици се опремени слично како и другите руски воени единици. Всушност, нивното ниво на снабдување е идентично – и доста ниско“, изјави Змаило за The Telegraph.
Украинската разузнавачка служба ГУР претходно тврдеше дека министерот за одбрана Андреј Белошов наредил хепатитисот Ц да се отстрани од листата на болести што спречуваат воена служба, со што се отворил патот за илјадници заразени затвореници кон фронтот, пишува Телеграф.
Експертите предупредуваат дека присуството на болни војници на фронтот создава психолошки притисок и ризик од ширење на инфекции.
Пензионираниот британски полковник и експерт за хемиско оружје Хамиш де Бретон-Гордон вели дека испраќањето вакви единици ја покажува очајната желба на Путин да го освои Покровск, град од стратешко значење.
„Путин е подготвен за сè. Испраќањето луѓе во кланица е дел од неговата стратегија, а Покровск е кланица“, вели тој. „Војните не се добиваат само на фронтовските линии – тие се губат и во болниците, во медицинските установи и преку способноста на војската да ги одржува своите луѓе здрави. Руската војска сега губи не само крв, туку и способност.“
„Ништо не е забрането“
Стапката на ХИВ кај руските војници во Украина драстично се зголеми – бројот на војници заразени со вирусот до крајот на 2023 година бил дваесет пати поголем отколку на почетокот на војната, според анализата на Карнеги Центарот.
Се верува дека голем број фактори довеле до експлозијата на болеста, вклучително и војниците што се свртуваат кон дрога.Според Дмитриј Змаил, употребата на нестерилизирани медицински инструменти од страна на руските лекари, особено повеќекратната употреба на шприцеви за анестезија, значително придонела за ширењето на ХИВ.
Сепак, присуството на толку многу болни војници на бојното поле претставува и директна закана за украинските сили, предупредуваат експертите.
„Присуството на болни Руси на бојното поле може да создаде морален и психолошки притисок поради близок контакт со таков непријател, а исто така ја принудува украинската армија да биде дополнително претпазлива и да се грижи за своето здравје и безбедност“, објасни Змаило.
