Две лица починаа, а најмалку 58 се заболени од легионерска болест во Њујорк

Две лица починаа, а најмалку 58 се заболени од епидемија на легионерска болест во Харлем минатата недела, соопштија властите на градот Њујорк.

Одделот за здравство на градот Њујорк издаде предупредување за епидемија во четврток, при што едно лице почина, а 22 се заболени, објави ABC News.

Легионерската болест е вид на пневмонија предизвикана од бактеријата „легионела“, која расте во топла вода и се пренесува со вдишување на контаминирана водена пареа.

- Advertisement -

Симптомите вклучуваат кашлица, треска, болки во мускулите и тешкотии при дишењето, а посебно внимание треба да се посвети на лицата над 50 години, пушачите и лицата со хронични белодробни заболувања.

Здравствените власти ги повикаа жителите на Харлем и околните области веднаш да побараат медицинска помош доколку развијат симптоми слични на грип.

„Легионерската болест може ефикасно да се лекува ако се дијагностицира рано“, изјави вршителката на должноста комесар за здравство Мишел Морс.

Болеста се шири со вдишување на водена пареа што ги содржи бактериите, како на пример од ладилни кули, џакузи и клима уреди.

Службениците нагласија дека болеста не се шири од човек на човек и може да се лекува со антибиотици. Детали за смртните случаи сè уште не се објавени.