Иранскиот претседател Масуд Пезешкијан за малку избегнал смрт за време на 12-дневната војна со Израел

Иранскиот претседател Масуд Пезешкијан за малку избегнал смрт за време на 12-дневната војна со Израел, пренесе ДПА, повикувајќи се на ирански медиуми.

Иранската новинска агенција „Фарс“ јави дека израелските воздушни сили бомбардирале комплекс на зграда на Советот за национална безбедност на 16 јуни, три дена по почетокот на војната. По нападот, електричната енергија била прекината, се наведува во извештајот. Учесниците на кризниот состанок успеале да се спасат, но некои од нив, вклучувајќи го и Пезешкијан, се здобиле со повреди на нозете.

Во интервју за американскиот водител Такер Карлсон пред околу една недела, Пезешкијан веќе го спомена обидот за атентат врз него, наведувајќи можно протекување на разузнавачки информации. Се шпекулира за инфилтрација на агент, објави „Фарс“.

- Advertisement -

Во меѓувреме, во иранските медиуми беше споделено видео кое наводно прикажува бомбардирања на планинскиот предел западно од Техеран.

Израел почна војна против Иран на 13 јуни, напаѓајќи цели низ целата земја, вклучувајќи нуклеарни постројки, а исто така убивајќи врвни научници и воени лидери. Иранските вооружени сили одговорија со ракетни напади. И во двете земји имаше жртви, вклучувајќи цивили.

Нешто повеќе од една недела по почетокот на војната, Вашингтон интервенираше и бомбардираше три од најважните нуклеарни локации на Иран.

По 12 дена напади, неочекувано беше објавен прекин на огнот. Сепак, во Иран растат стравувањата од нови напади.