ЕУ го осудува терористичкиот напад врз црква во Дамаск

Европската унија го осуди терористичкиот напад врз црквата „Мар Елијас“ во Дамаск, главниот град на Сирија, и изрази сочувство до семејствата на жртвите.

„Ова гнасно и кукавичко насилство врз христијаните е напад врз сите Сиријци. Тоа е сериозен потсетник за потребата од интензивирање на напорите против терористичката закана и обезбедување траен пораз на Исламската држава и другите терористички организации“, соопшти денес прес-службата на Европската унија.

Се наведува дека ЕУ, во овој критичен момент за земјата, се солидаризира со сирискиот народ и ги поддржува сите напори на преодните власти насочени кон обезбедување безбедност за сите Сиријци без дискриминација врз основа на етничка припадност или религија.

- Advertisement -

Самоубиствен бомбашки напад во грчка православна црква во Дамаск во неделата уби најмалку 20 лица, соопштија сириските власти, обвинувајќи ја џихадистичката група Исламска држава. Обединетите нации и неколку земји го осудија нападот, прв од ваков вид во Дамаск откако силите предводени од радикални исламисти го соборија од власт поранешниот претседател Башар ал-Асад на 8 декември 2024 година.