Тензиите меѓу Индија и Пакистан дополнително се влошија откако висок пакистански функционер рано утринава изјави дека има „веродостојни информации“ дека Њу Делхи планира воена акција против Исламабад во следните 2 дена, објави Си-Ен-Ен.
Оваа изјава доаѓа додека и САД и Кина ги повикуваат двете страни на воздржаност.
– Пакистан има веродостојни информации дека Индија планира да изврши воена акција против Пакистан во следните 24 до 36 часа – изјави пакистанскиот министер за информации, Атаулла Тарар, во невообичаен пост на мрежата Икс среде ноќ.
Тој не даде дополнителни детали за тоа какви докази има Пакистан.
Изјавата на Тарар доаѓа само една недела по масакрот во кој милитанти убија 26 туристи во планинскиот град Пахалгам во индискиот дел на Кашмир – напад што предизвика масовен гнев.
Индија го обвини Пакистан дека стои зад нападот – обвинување што Исламабад го негира. Пакистан понуди неутрална истрага за настанот.
Пакистан и Индија досега воделе 3 војни за Кашмир
Кашмир, една од најопасните точки на светот, е поделен помеѓу Индија и Пакистан, но двете земји го бараат целосно за себе.
Овие 2 нуклеарно вооружени земји ривали досега воделе 3 војни за оваа планинска територија, која по независноста од Британија пред речиси 80 години е поделена со де факто граница наречена Линија на контрола.
Нападот минатата недела предизвика силен гнев во Индија, а премиерот Нарендра Моди е под огромен притисок да одговори со сила.
Во 2019 година, Индија изврши воздушни напади на територија на Пакистан, по голем напад на паравоени сили во индискиот дел на Кашмир. Тоа беше првиот ваков напад на пакистанска територија од војната во 1971 година меѓу двете земји.
Најновиот напад врз туристи во Кашмир повторно предизвика стравувања дека Индија би можела да одговори на сличен начин.
Моди ќе ги гони напаѓачите „до крајот на светот“
Моди во жесток говор минатата недела вети дека ќе ги гони напаѓачите „до крајот на светот“. Масакрот предизвика растечки верижен одговор и тензии меѓу двете земји во изминатите денови.
Пакистанскиот министер Тарар во средата изјави дека секој „воен авантуризам од страна на Индија ќе биде сигурно и решително возвратен“.
Американскиот државен секретар Марко Рубио повикува на смирување и ќе разговара со своите колеги од Индија и Пакистан, можеби „уште денес“, изјави портпаролката на Стејт департментот, Тами Брус, во вторникот.
– Контактираме со двете страни и, секако, ги повикуваме да не ја ескалираат ситуацијата – рече Брус, цитирајќи изјава од Рубио.
Њу Делхи е сметан за важен партнер на Вашингтон во неговите напори да го спротивстави влијанието на Кина во Индо-Пацификот. Пакистан, исто така, се смета за клучен американски партнер.
Кина, која исто така тврди дека има контрола врз дел од Кашмир и која последниве години ги зајакна односите со Пакистан, исто така повика на воздржаност.
Кинескиот министер за надворешни работи, Ванг Ји, минатата недела разговарал со заменик-премиерот и министер за надворешни работи на Пакистан, Ишак Дар, при што изјавил дека секој конфликт меѓу Пакистан и Индија „не служи во интерес на ниедна страна“ и претставува ризик за регионалната безбедност, јави државната телевизија Си-Џи-Ти-Ен.
Односите меѓу Индија и Кина се затегнати последниве години, со судири на нивната спорна граница. Во меѓувреме, Пекинг и Исламабад ги зајакнуваат врските, при што Кина продолжува да инвестира во Пакистан преку иницијативата „Појас и пат“.
Дипломатските односи нагло се влошија
Во деновите по нападот во Пахалгам, двете земји брзо ги намалија дипломатските односи.
Индија ги поништи визите за пакистански државјани, а Пакистан возврати со реципрочен потег. Двете земји ги повикаа своите дипломати и граѓани да се вратат дома до 30 април.
Индија, исто така, го суспендираше своето учество во клучниот договор за споделување вода.
Договорот за водите на Инд го регулира користењето на водите од огромниот систем на реката Инд, што е витален ресурс за животот на стотици милиони луѓе во Пакистан и северна Индија. Реката потекнува од Тибет и тече низ Кина и низ индискиот Кашмир пред да стигне до Пакистан.
Исламабад го смета за акт на војна секој обид да се прекине или пренасочи водата што му припаѓа на Пакистан.
Индија и Пакистан демонстрираат воена сила
Оваа недела, и Њу Делхи и Исламабад демонстрираа воена сила.
Пакистан собори индиски дрон што наводно бил користен за „шпионажа“ во спорниот регион Кашмир во вторникот, потврдија безбедносни извори за Си-Ен-Ен.
Два дена претходно, индиската морнарица соопшти дека спровела тестирање на ракети „за да ја потврди и покаже подготвеноста на своите системи и екипажи за прецизни офанзивни удари на далечина“.
Тензиите се зголемени и долж Линијата на контрола, каде шест ноќи по ред се разменува оган.
