Министерот за локална самоуправа, Златко Перински, и градоначалникот на Општина Чаир, Висар Ганиу, ќе ги чекаат анкетите што ги спроведуваат нивните матични политички партии за да дознаат дали ќе бидат кандидати за претстојните локални избори оваа есен.
При денешната посета на Општина Чаир, во рамки на теренската иницијатива „Каде што срцето е дома“, Перински изјави дека сè уште е рано за конкретна одлука, но потенцијално би можел да се кандидира за градоначалник на Град Скопје.
– Времето ќе покаже. Сè уште е рано. Апсолутно дека сум потенцијален кандидат за градоначалник, но сè уште нема конечна одлука. Ќе видиме во која насока ќе се развијат работите – изјави Перински.
Од друга страна, Ганиу нагласи дека одлуката за кандидатот за Чаир ќе ја донесе партијата, но изрази уверување дека претставникот на коалицијата Вреди ќе биде способен да ја води општината.
– Партијата ќе одлучи за тоа. Сигурно се прават анкети, но убеден сум дека кој и да биде кандидат од редовите на Демократското движење и Вреди, ќе има способност и квалитет да ја води оваа општина на најдобар можен начин. Без разлика кој ќе биде избран, сигурен сум дека ќе биде вистинскиот кандидат кој ќе им служи на сите граѓани – изјави Ганиу.
Министерот Перински тврди дека не постои комуникација помеѓу Град Скопје и општините во градот. Перински обвини дека комуникација не постои по вина на Градот кој го предводи Данела Арсовска.
– После ноември, многу работи ќе се подобрат на подобро. И комуникацијата со сите градоначалници мора да биде на дневна основа за да се надминуваат препреките – рече Перински, алудирајќи дека ова ќе биде по изборите и смената на Арсовска.
Посочи дека оттаму доаѓаат и опструкциите.
– Најголемиот проблем кој Град Скопје го прави за општините се опструкциите на секое ниво и во суштина оние средства кои се влеваат во Град Скопје, а потекнуваат од страна на локалните самоуправи во Градот Скопје, несразмерно се инвестираат – рече Перински.
